أحرجتها جدا.. مصممة أزياء تهاجم أمينة شلباية بسبب غريب

أثارت مصصمة الأزياء الروسية فيرازولوتاريفا جدلا كبيرا بعد تعليقها على اللقاء التليفزيوني لخبيرة الاتيكيت أمينة شلباية في برنامج الإعلامي عمرو أديب وقالت في منشور علي صفحتها " المفروض قبل ما نروح أي لقاء تليفزيوني لازم نعرف موضوعه، ومعلومات كاملة عن المذيع..

الضيفة هنا راحت لقاء موضوعه الإتيكيت، بفستان شاطئ مفتوح صيفي بألوان تريندي، تقابل مذيع معروف إنه بيلبس بدل كلاسيك علطول..

إيه كان الأنسب؟
- بالاتيكيت لازم نحترم Dress Code لبس المذيع المستضيف لنا، فكان الأنسب يكون كتفها مقفول، فكان الأفضل يكون معاها بلوفر Soft بالدانتيل مثلا تحطه على كتفها..

- بالاتيكيت لازم نحترم القاعدة العريضة من المجتمع ال هيتفرج علينا.. ملكة إنجلترا لما زارت دولة عربية لبست طرحة..

طيب هل كان للحالة دي حل؟
آه، كان الأفضل "والأروش" للمذيع لما شافها جت بفستان مفتوح إنه لازم يقرر يشيل الجاكيت الكلاسيك قبل التصوير علشان العين متنفرش من التناقض، وبعدها لازم يفتح اسورة كم القميص ويشمرها لفتين، لان بالاتيكيت الراجل لو شال الجاكيت لازم يشمر القميص..

الاتيكيت يعني إزاي استعمل أو أعمل الحاجة صح لنفسي ولمن حولي.
الاتيكيت مش في الأكل بس، ده في الكلام والتحركات واللبس "علشان كده اللبس له Dress Code".