شيري عادل: هفكر كويس قبل الارتباط ونجاح مسلسل أيام فاق التوقعات (حوار)

شيري عادل لصدي البلد 

البطولة النسائية المطلقة تراجعت في السينما على عكس الدراما

السوشيال ميديا أمر واقع وبعدت عنه علشان بتكسف

والدتي أقرب حد ليا في الدنيا .. وسلوى خطاب ممثلة رائعة

نجمة مميزة استطاعت أن تخطف قلوب المشاهدين من خلال أدوارها المميزة ؛ تتميز بملامح  هادئة وبريئة ؛ لم تعتمد على جمالها فقط بل كانت لموهبتها دور كبير في كونها أحد اهم النجمات حاليا ؛ انها الجميلة شيري عادل الذي حاورها موقع صدى البلد حيث كشفت عن أسرار كثيرة عن حياتها وعن نجاح مسلسلها أيام .

وقالت: "سعيدة بنجاح مسلسل أيام وشخصية عبير؛ الدور كان بالنسبالي تحدي كنت بستناه طول عمري اني اقدم دور البنت الشعبية ؛ واتعرض عليا دور البنت الشعبية قبل كدة ولكن مكنش مكتوب بنفس كتابة المؤلفة سماح الحريري ".

وأضافت شيري عادل: "قصة حياة عبير عجبتني والمعاناة التي واجهتها وستواجها  كان دور مهم جدا؛ بالإضافة انني بحب اشتغل مع المنتج صادق الصباح ".

وتابعت: "لقيت صدي كبير جدا على أول الحلقات ومكنتش متوقعاه لأنها كانت أول تجربة لي تعرض علي منصة فقط ".

وروت شيري عادل كواليس مشهد حفل زفافها في مسلسل أيام والتي تفاجأت بعرض لقطات على شاشة قاعة الفرح تؤكد وجود علاقة بين زوجها واحدى جيرانه إلا أنها اقتنعت أنها كانت علاقة قديمة وقررت الاستمرار معه.

وقالت شيري عادل: "أنا في الموقف ده غالبآ  معرفش اني كنت هعمل كدا  ولا لا ؛ وانا سألت نفسي السؤال ده عشان اقتنع واقدر اعملوا بس المخرج محمد أسامه اقنعني ".

وأوضحت: "محمد أسامة مخرج شاطر وأنا بحبه جدا واستمعت بالعمل معه.. وهو اقنعني ان عبير تقدر تعمل ده ".

كما تطرقت شيري عادل خلال الحوار عن علاقتها بوالدتها وبالنجمة سلوى خطاب.

وقالت شيري عادل: "والدتي هي أقرب واحدة ليا في الدنيا ماليش غيرها مش باخد قرار غير لما بتوافق عليه حتي في الشغل أحيانا بنختلف ولكن لو حاجة عجباني مش بترفضها ".

وأضافت: "بقولها مش عاوزة أعمل الدور  ده مش مقتنعة بيه أو أرفض التواجد وخلاص وبحترم الجمهور في اختياراتي".

وعن علاقتها بالفنانة سلوي خطاب قالت: "أستاذة سلوى خطاب نجمة كبيرة جدا كلنا بنتعلم منها واشتغلت معاها من قبل في مسلسل البيوت أسرار وكان الخط الدرامي مختلف عن بعضنا البعض".

تابعت: "لكن اتعرفت عليها في اللوكيشن وبقينا أصحاب وسافرنا لبنان وهي ست عشرية جدا وبحب قعدتها ".

وكشفت شيري عادل عن رأيها في السوشيال ميديا.

وقالت :" اكيد في حاجات وهمية علي الإنترنت.. لانه عالم متعرفش مين عنده كام أكونت او انا عندي كام اكونت ؛ مش بنبقي عارفين".

أضافت: "لكن بكل تاكيد  السوشيال ميديا مهمه جدا!  وانا طبعا مش متفاعلة أوي لاني مش شاطرة في الموضوع ده  والناس كلها مهتمه بيها وبقيت هي الدعايه في هي مهمه ولازم نشتغل عليها".

وأكدت :"السوشيال ميديا فيها نجاح وهمي وبتكون بنسبة قليلة وانا مش مع ده بس طبعا لازم اشتغل على السوشيال ميديا لانها بقيت حاجه مهمه".

وعن إعتماد المنتجين على البلوجر الفترة الماضية قالت: "في ناس قليله بتفكر بالطريقه ؛  ولكن هذه الطريقة لم أقبلها كثيرا مثلا مرة مرتين قليلة جدا حمدالله".

وأشارت إلى أن السوشيال ميديا  أمر واقع ومهمة حتي لو أنا بتكسف اعمل فيديوهات اطلع لايفات مبعرفش افتح الموبيل اتكلم بس لازم يجي يوم واعمل كدا".

كما كشفت شيري عادل  عن أسباب غيابها عن المشاركة في الموسم الرمضاني.

وقالت شيري عادل: "موسم رمضان له طعم مختلف يخلينى اختار عمل مهم ومختلف علشان اشارك فيه ".

وأضافت: "المنافسة في رمضان بتكون قوية واعمال كثيرة بتتعرض والجمهور بيتفرج وبيكون متابع للأعمال في هذا الشهر".

وتابعت: "لكن في الوقت نفسه غيابي عن رمضان بيكون بسبب ان في اوقات مش بيتعرض عليا اعمال قوية فبفضل عدم المشاركة لازم إبقي واثقة اوى من العمل اللي هقدمه".

وأوضحت: "الأعمال خارج رمضان بيكون لها فرصة أكبر في المشاهدة علي الرغم ان هذا الوضع اختلف حاليا فمسلسل ايام وقت عرضه تم عرض خمس مسلسلات معه ".

أما عن سبب تراجع البطولة المطلقة النسائية في السينما .

قالت شيري عادل: "زمان أيام أفلام الأبيض والأسود كان فيه بطولة نسائية غير دلوقتي مع اني في كذا ممثله زي ياسمين عبد العزيز ومي عز الدين في ناس كتير حققوا فيها نجاح كبير جدا".

وأضافت: "هما موجودين بس مش كتير زي أيام زمان بس بيحققوا نجاح حلو اوي  لو في قصه حلوه والناس عايزه تشوفها".

وتابعت: "لو قدمت فنانة اللوم الكوميدي  هتنجح فيها واعتقد ان  الفتره المقبلة  هيكون في قصص نسائية ".

وكشفت شيري عادل عن  بعض الممثلات المفضلين لها وعن اذا كانت تشاهد بعض الاعمال الأخرى غير أعمالها .

وقالت: "انا بتفرج وأوقات بتفوتني حاجات؛  فبرجع اتفرج عليها من  بسبب الصدي الواسع  اللي بسمعه ".

وأضافت :" بقول لا انا عايزه اتفرج عشان أوقات ببقي مسافره او بصور؛ أنا بحب زمايلي وبحب المنافسة".

تابعت : "لما كنا عاملين مسلسل الا انا كانت منافسه قوية وكانت قصص وبنات كثيرة و قصص نسائية".

أكدت  : "حنان مطاوع وريهام عبد الغفور من احسن الممثلات اللي انا بحبهم جدا وبحب اتفرج عليهم؛ وبحب أعيش فكره المنافسة".

واختتمت  شيري عادل حديثها  حيث كشفت عن حقيقة ارتباطها .

وقالت : "لما اقرر الارتباط هقول بس أقرر الأول ؛ لسة مافيش حاجة".

وأضافت: "أعتقد إني هفكر كويس؛ اني هاخد خطوة زي دي إن شاء الله".

وحققت النجمة شيري عادل نجاحا كبيرا في مسلسلها أيام الذي يعرض حاليا علي قناة ام بي سي مصر .

مسلسل أيام بطولة شيري عادل وحورية فرغلي وسلوى خطاب و رياض الخولي و أحمد صفوت و مي القاضي  وإخراج محمد أسامة.