بوست فضفضة.. أسماء مصطفى تكشف عن تطورات حالتها الصحية

كشفت الإعلامية أسماء مصطفى عن تطورات حالتها الصحية بعد خضوعها لعملية جراحية خطيرة اثر اصابتها بمرض السرطان.

وكتبت أسماء مصطفى عبر صفحتها الرسمية بموقع فيسبوك :" من باب الفضفضة لأن الصفحة بالنسبة لي هى المتنفس الوحيد اللى كتير بعبر فيه عن اللى جوايا لما بكتب بوست وألاقى دعوات كتير الحمد لله بفرح قوى لأن محدش عارف مننا دعوة مين مستجابة أسرع أو مين أقرب كلنا بنحاول نجتهد وربنا المعين الشافى مش بيكون هدفى من البوست نفسى وبس لا بقول يمكن كلامى يفيد غيرى أو على الأقل يصبر حد على ابتلاءه لما يشوف ابتلاء شخص اخر ".

وأضافت أسماء مصطفى :"الحاجة الثانية إن  الصفحة وده من فضل ربنا عليها آلاف الناس معرفش فيهم إلا عدد قليل جدا لكن بينا تواصل ومحبة وثقة   مش مجاملات بين أصدقاء أو معارف ".

وتابعت أسماء مصطفى :"وأخيرا اوعدكم قريب جدا جدا اول ما أبدا مرحلة العلاج الجاية انى هرجع أطلع لايف وأحاول افيد غيرى ما هو طول ما فى نفس هنكمل الحياة وانا بعمل اللى ربنا أمرنى بيه بدعى وباخد بالأسباب واتوكل على الله 
واول حاجة واهم حاجة لينا جميعا هى الرضا بقضاء الله اى ما كان ولانه لا راد لقضاء الله الا بقدر الله وشكرا ليكم انكم مستحملنى ولسه بتدونى امل انى على الاقل طول الفترة الى عدت من حياتى كنت صح وكسبت حب ومحبة الناس  الحمد لله:".

حواجز جديدة، وورم خبيث

وكان قد كشف أحد الأصدقاء المقربين للإعلامية أسماء مصطفى عن تطورات حالتها الصحية بعد خضوعها لعملية جراحية جراء إصابتها بمرض السرطان.

وكتب عبر حسابه بموقع فيسبوك : «من وقت تعب أسماء مصطفى وكل شهر بسيناريو وكل عملية بتتقدم خطوات وبتفوق من البنج تلاقي حواجز جديدة».

وأضاف: «آخر عملية أول امبارح، ربنا لطف بيها والدكتور اكتشف حاجة صعبة جدا مكنتش باينة في المسح الذري حرفيا حياتها كانت في خطر، الحمد لله عدت على خير، لكن للأسف لسة جزء من الورم الخبيث جدا موجود».

بداية الحكاية

وكانت قد كشفت الإعلامية أسماء مصطفى المذيعة بقناة سي بي سي إكسترا، قصة إصابتها قائلة: “الإجابة ببساطة إنى مقتنعة ومدركة إن مريض السرطان بيقدر يفيد غيره بتجربته وبيكون فعلا فيها أمور كتيرة واحيانا معقدة جدا بس انا ما زالت فى هذه المحنة وحتى الآن واللحظة معنديش جديد غير انى منتظرة انى مع الفحص الجاى باذن الله ألاقى استجابة للعلاج واكيد باذن الله لما ربنا يكتبلى الشفاء من عنده هطلع واقول واتكلم معاكم كتير نفسى أكون مفيدة فعلا للناس بس حاليا مينفعش".

وتابعت الإعلامية "أسماء" عبر منشورها "الحاجة الثانية زى ما وضحت قبل كده ده مرض ملوش كتالوج فى ناس نفس حالتى وكانت ظروفهم أفضل منى وفى العكس طبعا الشئ الأهم اللى هنصح بيه وبكرره مفيش حالة زى الثانية حتى لو كانت نفس الإصابة لأن جسمنا مش واحد ولا هنعانى نفس الأعراض أنواع السرطان واحدة ولا العلاجات واحدة ولا الأجسام واحدة".

وتابعت أسماء مصطفى عبر منشورها "علشان كده بلاش تبادل خبرات الأدوية لأن دى يحددها الطبيب المختص فقط حسب كل شخص وفى حالات معقدة زى حالاتى بتاخد أكثر من نوع علاج كيمو مع بعض وكل شوية تعديل رجاء نخلى بالنا نتوكل على الله وناخد بالأسباب وربنا كريم وان شاء الله اقابلكم على خير".