EN
قضت محكمة جنايات الجيزة، المنعقدة بمجمع محاكم جنوب القاهرة بزينهم، برئاسة الدكتور المستشار محمد الجنزوري وعضوية المستشارين محمد أنور ابوسحلي والمستشار الدكتور شريف محمد حافظ، بمعاقبة نقاش بالسجن المؤبد، لاتهامه بقتل مسجل خطر لخلافات بينهم بمنطقة بالطالبية.
وقال المتهم في اعترافاته:" أنا غلطان.. و اللى حصل كنت قاعد في البيت لقيت تامر ودنو واقف تحت البيت بينادي عليا وبيقولي انزل نقعد مع بعض شوية بس أنا عارف إني أول ما أنزل هو هيسحبني بعيد عن البيت علشان يفتشني في الفلوس اللى معايا علشان هو أكتر من مرة كان بيثبتني في الشارع لوحدي وساعات قدام زمايلي ويرفع عليا السلاح مرة كتر ومرة سكينة ويفتشني في الفلوس والتليفون وساعات كان يبى معايا سيجارتين اشربهم فيروح واخدهم فأنا قلت النهارده هعلم عليه علشان يبطل يعمل معايا كده فخدت كزلك من البيت وخبيته ونزلت واتمشيت معاه لحد ما وصلنا شارع البنك وراح مطلع كتر علشان يفتشني وقالي هات اللى معاك قلتله يا عم تامر ما احنا رايحين البيت عندك هناك هطلعلك اللى انت عايزه فراح مدخل الكتر تاني وأول ما لف وشه روحت مطلع الكزلك وضربه بيه في ظهره ضربة واحدة والكزلك غرز في جسمه وهو اللى طلعته من لبسي وراح واقع على الأرض وطلعت أنا على البيت جري وبعد كده الحكومة جت خدتني من البيت وده كل اللى حصل".
علاقة المتهم بالمجني عليه
وأضاف المتهم في اعترافاته:" الكلام ده حصل يوم 3 مايو 2022 حوالي الساعة 8.30 صباحا بشارع البنك بالكونيسة، وكنت ماشي مع المجني عليه تامر ودنو ورايحين على بيته، واللى كنت اعرفه انه من المنطقة عندنا، ومفيش علاقة معاه قبل كده وهو كان دايما بيشوفني في الشارع في المنطقة عندنا ويقعد يفتشني في الفلوس والحاجة اللى معايا دايما تحت تهديد السلاح علشان هو عيل مسجل، وهو عمل معايا كده أكتر من 5 مرات، وبعد ما جه أخدني من البيت ومشينا مع بعض حاول يفتنشي في فلوسي ولما لف ضربته في ضهره من الناحية الشمال على غفلة ومحاولش يقاومني ووقع على الأرض ".
حصوله على السلاح
وأوضح المتهم:" أنا جبت السلاح من عندي في البيت، والمجني عليه طلع كتر وهددني علشان ياخد اللى معايا بس معورنيش ولا ضربني بيه، وأنا ضربته علشان كنت عايز اعلم عليه علشان يفتشني وياخد مني فلوسي وحاجتي، وأنا اتمشيت مع تامر على اساس ان احنا رايحين بيته وقلت أنا اعلم عليه في حتة بعيدة عن بيتي وبيته والدنيا كانت هادية في الشارع علشان الدنيا أجازة، وأنا كان عندي قضية سلاح ابيض وخدت حكم غيابي".
إحالة المتهم للجنايات
وأمر المستشار طارق حسنين كروم، المحامي العام الأول لنيابة جنوب الجيزة الكلية، القضية رقم 8051 لسنة 2022 جنايات الطالبية، والمقيدة برقم 1457 لسنة 2002 كلي جنوب الجيزة، إلى محكمة الجنايات، والمتهم فيها عبد الرحمن سيد هاشم عبد العال، محبوس، 22 سنة، نقاش.
واتهمت النيابة العامة المتهم لأنه في يوم 3 مايو 2022 بدائرة قسم شرطة الطالبية بمحافظة الجيزة، قتل المجني عليه تامر صلاح حسن فراج، عمدا مع سبق الإصرار بان بيت النية وعقد العزم على إزهاق الروح لسبق الخلف المستدعي بينهما وأعد لهذا الغرض سلاح ابيض كزلك، وما أن ظفر به حتى انهال عليه طعنا بذات السلاح المار بيانه فأحدث إصابته الموصوفة بتقرير الصفة التشريحية والتى أودت بحياته، وأحرز سلاح ابيض كزلك، بغير ترخيص وبدون ضرورة مهنية أو حرفية.
شهود الإثبات
وشهد حسن سيد حسن، 59 سنة، مدير إدارة شركة سيد للأدوية، بأنه وحال تواجده بالعين محل سكنه بمحيط مسرح الواقعة تناهى إلى سمعه استغاثة المجني عليه بالتوجه إليه أبصره مدرجا أرضا غارقا في دمائه وبالاستفسار عن سبب ذلك اخبره بقيام المتهم بالتعدي عليه.
وشهد محمد عويس عبد العاطي شحاته، 28 سنة، معاون مباحث قسم شرطة الطالبية، بان تحرياته توصلت إلى صحة قيام المتهم بقتل المجني عليه لسبق الخلاف الواقع بينهما والذي اثار حفيظة الأول مما دعاه إلى تجهيز سلاح أبيض للاستقواء به تجاه المجني عليه والذي بتقابلهما سويا أشهر المتهم ذلك السلاح تجاه المجني عليه وكال له بضربة فأحدث إصابته الموصوفة بتقرير الصفة التشريحية والتي أودت بحياته مضيفا بتمكنه من ضبطه للمتهم والسلاح الابيض موضوع الواقعة.
