هالة الدمراوى تكتب: عادل إمام وحشنى !

أنا الزعيم وحشنى، طلته، أخباره، وشه، حركاته، إيفيهاته !
لا مش مكتفيه بأعماله السابقه، قديمه كانت أو حديثه، أنا عايزه أشوف الأحدث دائما له ! 
ومش قادره علي بعده !
أيوه والله، أنا اللي بتفرج علي  عادل إمام لأنى بحبه أوى و بيوحشونى جدا من السنه للسنه .
أنا اللي بتفرج علي عادل إمام لأنى إتربيت علي وجوده فى حياتى من خلال أعماله العمر كله... اللي بقت بالنسبه لوجدانى ماضي و حاضر جميل ! وبقت إفيهاته و حركاته متضفره جوه حواراتى مع كل اللي حواليه !
أنا اللي بتفرج علي عادل إمام لأنه كنز مصري بجد... والعالم كله عارف كده .. إحنا بس اللي ساعات بيبقى  فى مننا "قلالاة أصل" !
إنا بتفرج علي عادل إمام و هفضل أتفرج عليه بصرف النظر عن مواضيع أعماله...
أنا وقعت معاه من أكتر من ثلاثين سنه عقد حب مدى الحياه ! 
وده مش معناه إنى مش بحب كل نجومنا الآخرين... بس حبك لشخص معاشره سنوات عمرك كله و ما شوفتش منه غير كل إخلاص و سعاده، غير حبك لشخص عايش معاك بقاله كام سنه و ده مش عيب !
 أنا متأكده إن ده مش إحساسي أنا بس ، ده شعور الشعب العربي كله اللي فاهم و عارف و مقيم قيمة مجرد طلته دقائق فى أى مكان، أو نظرته ثوانى لأى كاميرا !
أتمنى أن يقوم المخرج رامى إمام و النجم محمد إمام أبناء الزعيم ، بهذا الدور، همزة الوصل بين الزعيم و جمهوره .
أعلم أن ظروف الكوفيد اللعين قد تبعد الزعيم عن البلاتوهات و هذا حقه علي نفسه و على جمهوره التفهم و الوعى و التقبل لمصلحته العليا، ولكن لا أطلب سوى أخبار حقيقيه له تطمئن أحبائه وأنا منهم، صوره فى منزله تسعدنا فيها ضحكته الحلوه و تبهجنا طلته الهاشه الباشه ! 
عادل إمام مش شويه ، و ليس النجم الذى يتحمل جمهوره إختفائه أبدا !