EN
حصل موقع صدى البلد على تقرير تحليل المخدرات الخاص بفتاة حدائق القبة التي تم ضبطها برفقة شاب داخل سيارة بشارع بورسعيد وبحوزتها مواد مخدرة.
تقرير تحليل مخدرات فتاة حدائق القبة
وجاءت نتيجة تحليل فتاة حدائق القبة، بعد ضبطها بحوزتها كميات من المخدرات داخل سيارة احتواء عينات البول والدم على المورفين والترامادول والديسميثيا ترامادول وأيض الامفيتامين والميثامفيتامين.
قالت نهلة م، فتاة حدائق القبة، أنا عندي 30 سنة من مواليد غرب الاشلاق العباسية وطول عمري ساكنة هناك ووالدي شغال موظف حكومة كان متزوج قبل والدتي زوجتين تانيين وخلف من واحده ولد ومن التانية بنت وبعدها اتجوز والدتي وخلف منها ولد وبنت توأم وهما أكبر مني وبعدها خلقني ووالدتي كانت شغالة موظفة في حي الوايلي ووالدي كان بيصرف عليا أنا واخواتي الاشقاء وغير الأشقاء وكان بيعاملنا نفس المعاملة.
وتابعت نهلة - فتاة حدائق القبة - في اعترافاتها، والدي صرف علينا ودخلنا كلنا تعليم وأنا اتخرجت من كلية الحقوق سنة 2016 ووالدي توفت وأنا في الدراسة سنة 2014، وفي 2018 اتجوزت أحمد اللي كان شغال معايا في نفس الشركة وفي أخر سنة 2018 انفصلت عنه بسبب الظروف المادية وفي أول سنة 2019 اتعلمت شرب المخدرات بسبب صحابي وكنا بنشرب هيروين وفي نص سنة 2019 أهلي عرفوا وقرروا يساعدوني ويعالجوني ودخلوني مستشفى العباسية.
وتابعت فتاة حدائق القبة في أقوالها، مقدرتش اقعد في المستشفى أكثر من 3 أيام بسبب أني بخاف من الحبس ومن الناس الغريبة، وطلبت من أهلي انهم يطلعوني من المستشفى وابتديت رحلة العلاج في البيت عن طريق اني كنت بتابع مع دكتور وكان بيكتبلي أدوية وأخدها وساعتها ابتديت اصنع ملابس يديوة وسجاد واشتغل في التصميم عشان اشغل وقتي وابعد عن المخدرات لحد سنة 2021.
وأضافت فتاة حدائق القبة، بسبب الخنقة وإني ديما محبوسة في البيت رجعت تاني أشرب هيروين وكان من فترة لفترة ابطل واشرب ونزلت اشتغل في شركة للمراتب في نص 2023 وفي أخر السنة أنا اتعرفت على المتهم اللي معايا لأنه شغال سواق في شركة توصيل، وكان وصلني في مرة من فترة من العاشر لبيتي في القاهرة الجديدة ومكنش معايا فلوس ساعتها وطلبت منه اني احوله الفلوس لما اطلع ووافق ودي كانت بداية الثقة بيني وبينه.
وأكملت فتاة حدائق القبة، بعدها ابتدى يكون في بينا تعامل وابتدينا نتكلم مع بعض وفي مرة كنت عايزة اشتري أيس وسألته وابتديت اشده في الكلام عشان أعرف هو ليه في المخدرات وسألته يعرف يجيب لي آيس ولا لا وساعتها قالي أنه يعرف حد بيجيبه وفعلا جاب لي من حد صاحبه مش عارفاه بس في الوفت ده عرفت أنه بيشرب هو كمان وشربنا مع بعض، ومعجبنيش الآيس بس عرفت الطريق اللي اجيب منه لو احتجت.
واستطردت فتاة حدائق القبة، يوم الواقعة كنت عايزة اشتري هيروين لان اللي معايا خلص وكلمت الديلر اللي بتعامل معاه في منطقة مسطرد وطلبت منه اني اروح شارع بورسعيد بين الحدائق والأميرية وأن في واحد هناك ودي كانت أول مرة تحصل لأني كنت متعودة اروح أجيب منه في مساكن مسطرد وأنا مكنش معايا عربية وقفتها، اتصلت على المتهم وعرفته اني رايحة مشوار وجالي البيت واديته آيس وهو مكنش يعرف أنا رايحة ليه وساعتها قابلت الديلر واداني الحاجة والمتهم سألني ايه ده وقولت له ده هيروين وأنا مدمنة عليه.
واختتمت نهلة، ساعتها زعل مني وقالي إزاي تعملي كدة ومفيش بعدها بدقيقة وقف ميكروباص نزل منه 3 أشخاص وكانت المخدرات على رجلي وأول ما شوفتهم اتخضيت وقعوا في العربية راح واحد نزلني وفتشني خد الحاجة وقبضوا عليا أنا والسواق، وأنا عايزة اتعالج وابطل مخدرات وعارفة ان ربنا غضبان عليا وأن افعالي سبب في اللي جابني هنا، وأنا نفسي اتعالج واتوب لربنا ويسامحني.
وقال المتهم الثاني في قضية فتاة حدائق القبة محمد ج خلال تحقيقات النيابة العامة معه، أنا عندي محل تصليح كمبيوتر في العاشر من رمضان بشتغل فيه وبعمل صيانات لشركات، وبالليل بشتغل سواق أوبر على عربية بتاعت والدتي عشان أحسن دخلي، ومن نص سنة 2023 وأنا اتعرفت على نهلة من خلال التطبيق اللي شغال عليه ساعتها هي كانت مروحة من الشركة ورايحة التجمع وركبت معايا وبعد ما وصلتها قالت لي مش معايا فلوس وهطلع البيت وأحولهم لك وبعد ما طلعت بعتت لي تمن الرحلة وسجلت رقمها وبقت تكلمني كل فترة.
وتابع المتهم في تحقيقات قضية فتاة حدائق القبة، ويوم الواقعة نهلة كلمتني وطلبت مني اروح لها على البيت بتاعها في التجمع وكانت عايزاني اوصلها مسطرد وساعتها قولت لها أني في العاشر من رمضان وهخلص شغل واروح لها وبعد ما وصلت فضلت مستني حوالي ساعتني ولما نزلت قالت لي مش هنروح مسطرد وادتني التليفون أكلم واحد عشان يوصف لي العنوان وقالي وصلها شارع بورسعيد عند شركة الكهرباء في حدائق القبة وبعد ما وصلت اتصلت بالراجل وطلبت مني أن أكلمه وقولت له أني وصلت.
واستكمل المتهم بقضية فتاة حدائق القبة، الراجل قالي قرب على البنزينة شوية ناحية مدخل الشارع وروحت في المكان اللي قالي عليه وساعتها حساس الأيدل بتاع العربية علق مني ونزلت افتح الكبوت ولقيت نهلة نزلت من العربية وقابلت شاب وقفت معاه دقيقتين ورجعت وكنت ساعتها بظبط الحساس وبعد ما ركبت مشينا 100 متر لقيت ميكروباص بيوقفني ونزل منه 4 أشخاص وراحوا ناحية نهلة وهي ساعتها قالت لي اطلع بسرعة ومكنتش فاهم، لقيتهم بينزلوها من العربية وهي بتعيط وتقولهم سيبوني أنا معملتش حاجة.
واختتم المتهم الثاني في قضية فتاة حدائق القبة قائلا راح واحد خد شنطتها وفتحها طلع أكياس وقالها كل دي مخدرات وجه واحد تاني وقف جنبي وقالي ايه علاقتك بيها قولت أنا سواق وماليش علاقة راح فتشني وخد الموبايل وفتش العربية وخدوني أنا ونهلة وركبوني الميكروباص وفي واحد ركب العربية مكاني وطلعنا على القسم وعرفت أن نهلة بتشرب هيروين وكانت بتشتري مخدرات.
