EN
يواصل موقع صدى البلد نشر نص تحقيقات قضية تزوير عصام صاصا مطرب المهرجانات الشهير المتهم فيها برفقة شقيقه وآخرين، حيث جاءت اقوال معاذ وليد مدير أعمال عصام صاصا توضح تفاصيل التزوير.
تفاصيل أقوال مدير أعمال عصام صاصا
وقال مدير أعمال عصام صاصا، المحامي قال أن لازم أهلية المجني عليه يتم التصالح معاهم، وحضرنا الجلسة والست اتنازلت واتصالحت، ومعرفش مين صاحب فكرة توكيل المحامي المزور بس عصام قالي أنه عايز محامي كبير يمسك القضية.
وتابع مدير أعمال عصام صاصا، احنا سافرنا يوم 9 مايو ومعرفش إذا كان عصام عمل توكيل للمحامي ولا لا واللي أعرفه أن وأنا في دبي لقيت عصام بيكلم قرايبه عشان يستلف منهم فلوس يديها لمحمد أخوه عشان يوصلهم للمحامي وبعد ما جمع الفلوس كنت متابع مع محمد وبكلمه عشان اطمن عليه لأني عارف أنه ماشي بمليون جنيه.
وأضاف مدير أعمال عصام صاصا خلال التحقيقات، أنا معرفش اي حاجة عن التوكيل المزور وعصام كان ساعتها معايا في دبي، ومعرفش كمان هو وصل للمحامي إزاي، ولا مضمون التوكيل ايه بس أنا بعت السواق يستلم التوكيل اللي معمول في الإمارات من شركة الشحن في جسر السويس عشان يوديه للمحامي.
وأكمل مدير أعمال عصام صاصا، أنا عرفت بعد كدة أن في حوارات على التوكيل وسمعت أن في حد تاني هو اللي بصم على التوكيل مكان عصم، ومعرفش هو عمل كدة ليه، وعلافتي زي ما قولت أني روحت مرة للمحامي وبعت السواق يستلم التوكيل اللي اتعمل في القنصلية.
وقال محمود الليثي في أقواله ضمن تحقيقات قضية عصام صاصا، اللي حصل في حادث عصام أني كنت لسه مخلص حفلة واتصل بيا حد في المجال وقالي ألحق عصام صاصا عامل حادثة وخبط واحد وجريت عليه على الدائري، ولما وصلت لقيت الراجل متوفي وعصام واقف وعربية الشرطة واقفة وعصام كان منهار وبيقول حق الراجل في رقبتي ليوم الدين.
وتابع محمود الليثي في أقواله، عصام صاصا قالي حق الراجل وعياله في رقبتي ومرديش يمشي وشيلنا المتوفي في الإسعاف وروحنا قسم الطالبية ولما روحنا عصام اتعرض على النيابة وخد إخلاء سبيل من القسم وكان عنده حفلة في دبي في الإمارات يوم 9 مايو وسافر بعد ما خرج من القسم عشان الحفلة دي.
واستكمل محمود الليثي في أقواله، بعدها بيومين معاذ مدير أعمال عصام صاصا كلمني وقالي أنه في محامي اسمه محمد حمودة وعايزين نعرف اتعابه كام عشان عصام، وروحت لمكتب محمد حمودة فعلا وقعدت معايا أنا وصاحبي سيد واتفقنا على الأتعاب حوالي 2 مليون جنيه وبعدها مشيت وكلمت معاذ وقولت له خلاص الأمور تمام.
وأضاف محمود الليثي في تحقيقات قضية عصام صاصا، عصام صاحبي من 2023 اتعرفت عليه في فيلم وهو واد جدع وغلبان، وقعدنا في مكتب المحامي ربع ساعة عشان نتفق على الأتعاب وبعدها مشيت ومعرفش هو المحامي اللي عصام عمل له التوكيل من برا ولا لا، ومكنش معايا اي مستندات وأنا رايح، ولا أعرف حاجة عن التوكيل المزور بتاع عصام، وكل القصة أني كنت وسيط بس.
