EN
كشفت تحقيقات النيابة في قضية تزوير عصام صاصا مطرب المهرجانات الشهير المتهم فيها برفقة شقيقه وآخرين، مفاجآت عديدة ضمن أقوال محمود الليثي ومدير أعمال عصام صاصا.
نص التحقيقات في قضية تزوير عصام صاصا
وقال مدير أعمال عصام صاصا خلال تحقيقات قضية التزوير “محمود الليثي راح هو وسيد الصعيدي قابلوا المحامي محمد حمودة، وكان معاهم محمد أخو عصام، وساعتها الليثي دفع مليون جنيه ومحمد أخو عصام دفع المليون التانية عشان أتعاب المحامي كانت 2 مليون جنيه”.
وقال مدير أعمال عصام صاصا خلال تحقيقات النيابة في قضية التزوير، “اللي حصل إن عصام صاصا اتصل بيا يوم ما عمل الحادثة وبعدها روحت له مكان الحادثة وروحت معاه قسم الطالبية وقعدت معاه الفترة اللي كان موجود فيها في القسم والنيابة، وساعتها كان معاه محامية وأخدت مني فلوس الكفالة 30 ألف جنيه وأخدت اتعابها وعصام قالي إنها أخدت منه فلوس تاني”.
وتابع مدير أعمال عصام صاصا، أن فيه محامي كبير اسمه محمد حمودة وكان عنده قضية زي دي والمتهم أخد فيها براءة، وساعتها العيلة كلها كانت متجمعة وأصحابنا كلهم كانوا بيتناقشوا في موضوع المحامية وعصام قالي اتفق مع محمد حمودة أنا بقولك هو اللي هيمسك القضية، وساعتها قال للمحامية كدة وحصلت بينهم مشادة وساعتها عرفت أنه لغى التوكيل اللي كان عاملة ليها.
واستكمل مدير أعمال عصام صاصا، خلال التحقيقات “بعدها عصام كان عنده حفلة بعد الحادثة بـ 3 أيام وسافرنا أنا وهو وسارة خليفة وحمو بيكا واسلام ساسو وجهاد مراته ومحمد أخو سارة وركبنا طيارة واحدة وسافرنا دبي وأنا في دبي عرفت من عصام أن محمد أخوه ومحمود الليثي وسيد الصعيدي راحوا للمحامي واتفقوا معاه وأن الليثي دفع مليون جنيه ومحمد أخو عصام دفع المليون التانية”.
وقال محمود الليثي في أقواله ضمن تحقيقات قضية عصام صاصا، "اللي حصل في حادث عصام أني كنت لسه مخلص حفلة واتصل بيا حد في المجال وقالي اِلحق عصام صاصا عامل حادثة وخبط واحد وجريت عليه على الدائري، ولما وصلت لقيت الراجل متوفي وعصام واقف وعربية الشرطة واقفة وعصام كان منهار وبيقول حق الراجل في رقبتي ليوم الدين.
وتابع محمود الليثي في أقواله، عصام صاصا قالي حق الراجل وعياله في رقبتي ومارضيش يمشي وشيلنا المتوفي في الإسعاف وروحنا قسم الطالبية ولما روحنا عصام اتعرض على النيابة وأخد إخلاء سبيل من القسم وكان عنده حفلة في دبي في الإمارات يوم 9 مايو وسافر بعد ما خرج من القسم عشان الحفلة دي.
واستكمل محمود الليثي في أقواله، بعدها بيومين معاذ مدير أعمال عصام صاصا كلمني وقالي أنه فيه محامي اسمه محمد حمودة وعايزين نعرف اتعابه كام عشان عصام، وروحت لمكتب محمد حمودة فعلا وقعدت معايا أنا وصاحبي سيد واتفقنا على الأتعاب حوالي 2 مليون جنيه وبعدها مشيت وكلمت معاذ وقلت له خلاص الأمور تمام.
وأضاف الليثي في تحقيقات قضية عصام صاصا: عصام صاحبي من 2023 اتعرفت عليه في فيلم وهو واد جدع وغلبان، وقعدنا في مكتب المحامي ربع ساعة عشان نتفق على الأتعاب وبعدها مشيت ومعرفش هو المحامي اللي عصام عمل له التوكيل من برا ولا لا، ومكنش معايا أي مستندات وأنا رايح، ولا أعرف حاجة عن التوكيل المزور بتاع عصام، وكل القصة إني كنت وسيط بس.
