EN
بيحبني زيادة عن اللزوم لدرجة إني اتخنقت منه.. بهذه الكلمات سردت عبير قصتها مع زوجها التي وصلت إلى محاكم الأسرة حيث تقدمت بدعوى خلع في محكمة الأسرة بالكيت كات طالبة إنهاء تلك العلاقة التي رفض زوجها إنهاءها بسبب حبه لها.
عبير تطلب الخلع من زوجها بسبب حبه الزائد
وقالت عبير عن قصتها مع زوجها «أنا عرفت كريم من أيام الجامعة لما كان عمري 19 سنة، وساعتها كانت الدماغ غير الدماغ دلوقتي وفضلت أحبه 3 سنين، وبعدها محصلش نصيب، لكن بعد 5 سنين وهو بعيد عني رجع تاني وطلب إيدي للزواج وأسرتي وافقت وخصوصا إن حالته كانت اتغيرت».
وتابعت عبير «في الفترة دي لما رجعنا اتخطبنا وطبعا أنا كنت سعيدة جدا لأن ده حب عمري، وبعد فترة خطوبة 9 شهور اتجوزت كريم وكنت عايشة حياة في منتهى السعادة في بداية الجواز ومفيهاش أى مشاكل ولا أي حاجة بيني وبينه لكن مع الوقت بدأت المشاكل تدخل جوايا مش عارفة شيطان ولا أيه».
واستكملت عبير في قصتها عن زوجها «اتخنقت من طريقة حبه ليا، كان بيحبني بطريقة غير طبيعية لدرجة إني زهقت، في المشاكل كان رومانسي وفي كل حاجة رومانسي وأنا اتخنقت من الطريقة دي مش عارفة اتعامل بالشكل ده لازم يكون في توابل في العلاقة لازم يكون في خناقات مش كل حاجة حب وبس».
واختتمت عبير قصتها مع زوجها قائلة «قعدت معاه أكتر من مرة وقولت له أنا مش عارفة أعيش كدة الحياة وردي في كل حاجة، لازم نتخانق ونتصالح ويكون الحب أقل من كدة لكن هو مفيش فايدة ولما طلبت الانفصال قالي مش هقدر استغنى عنك سبت البيت وروحت بيت أهلي جالي بورد وحاجات في البيت، قولت له بردو، ده أنا اللي سايبة البيت».
ولجأت في النهاية إلى محكمة الأسرة طالبة الخلع منه لأنني لا أستطيع استكمال حياتي الزوجية بهذا الشكل وهذه الطريق التي تجعلني أشعر أنني أنا من يقود البيت وأنه لن يتغير وسيظل كما هو مشيرة إلى «أنا اتخنقت من طريقة الحياة دي مش كل حاجة رومانسية وحب أومال فين المشاكل والخناقات».
