EN
أشعلت قصة العثور على أعمال سحر على جبل عرفات ضجة كبيرة على مواقع التواصل الاجتماعي.
ولكن خرجت الكثير من الاصوات التي تؤكد استحاله وجود أعمال سحر على جبل عرفات لأسباب عديدة من بينها الزحام الشديد والنفقات الباهظة وقدسية المكان.
وهناك منشور لأحد نشطاء السوشيال ميديا كشف الكثير من الأسرار المتعلقة بقصة تريند أعمال سحر عرفات.
وكشف محمد أمير، كاتب ومنشئ محتوى، أن الأشياء التي تداولها مؤخرا عن أعمال سحر عرفات ليست جديدة بل تحدث كل عام في نفس المكان ولكن لم يتم نشرها .
وأوضح أن هناك خطأ في فهم الواقعة وتفسيرها فهي في الأغلب ليست أعمال سحر وإنما مقتنيات وبقايا من بعض الحجاج تم سقوطها دون قصد أو بقصد عودة زيارة جبل عرفات مرة أخرى.
وشرح القصة كاملة في منشور له على فيسبوك، قائلا: عشان تكونوا فاهمين القصة قبل وبعد موسم الحج كل سنة، الجهات المدنية وفرق الكشافة بتطلع تنضف مشعر عرفات، وكل سنة يعثروا على نفس المخلفات دي شعور وخواتم ولفائف وحاجات كدة، يتم جمعها وتسليمها لمندوب فرع وزارة الشؤون الاسلامية ويسلمها للجنة اسمها الجنة الوطنية لمكافحة أعمال السحر والشعوذة في السعودية، اه هناك فيه لجنة اسمها كدة وبتعاقب قانونيا المتورطين في السحر بالسجن والغرامة وصولا للاعدام، بتاخد المخلفات دي وبتفصل في الموضوع ده وتقول دي أعمال سحر ام لا وتطارد أصحابها .. يعني الموضوع مش جديد.
السؤال هنا هل كل اللي بيلاقوه هو أعمال سحر؟ الإجابة لأ..هما بيجمعوا كل الأغراض المشتبه فيها وبعدين يحللوها، واغلب اللي بيلاقوه مش سحر، يعني بيكون ناس حلقت شعرها للتحلل من الاحرام "في حج التمتع بيعملوا عمرة قبل الحج" وعايزين يحتفظوا بيه وبينسوه وهما ماشيين زي الضفيرة اللي في الصورة كدة، او ورقة عليها اسماء ناس كانوا بيدعولها وسابوها، خواتم وقعت من الحجاج، واحد اتعور ومسح في منديل ورماه، او حتى اعمال السحر الحقيقية، حاجات زي دي.
طيب اللي بيعمل كدة الحجاج؟ لأ، اللي بيعمل كدة الغالبية العظمى من الوافدين الافارقة او المواطنين اللي عايشين هناك بالفعل وبيمارسوا السحر، وبيعملوا كدة في غير مواسم الحج تجنبا للسؤال والملاحقة القانونية والزحام لان السعودية بتجرم الافعال دي وبتشدد عليها.
واستكمل قائلا: "اصل بالعقل كدة مين في الدنيا هيدفع آلاف الدولارات ويسعى لتأشيرة وتصريح وقرعة ويكسب ويسدد ويمر بالطواف والمناسك والمشاعر كلها عشان يروح ليلة العيد تحديدا وسط الملايين والزحمة عشان يدفن "أعمال سحر" على جبل عرفة مع أن الأسهل يتم دفنها في المقابر او الصحراء؟ أصل الفكرة من دفن الأعمال انه يخبأ في مكان محدش يلاقيه فيجي الساحر يدفنه في مكان بيتجمع فيه ملايين؟ ..صعبة شوية مش مستحيلة لكن صعبة".
و"لو مستغربين من الموضوع ده ففي التاريخ القديم والحديث فيه ناس حاولت تخلع الحجر الاسود وناس اعتدت عليه وناس قتلت حجاج وناس دفنت طلاسم في صحن الكعبة وملوك طافت وقت الحج سكرانين ، وناس اخذت الحجاج رهائن واحتلوا الصحن، وناس حاولت تعتدي على قبر النبي، وحاجات اكتر مما يتحمله تخيلك"
الخلاصة: أننا في 2024 عصر الذكاء الاصطناعي إلا أن ممارسة السحر موجودة لسة، وموجودة من قبل ظهور النبي نفسه، ومعروف أن النبي تعرض لمحاولة سحر في حياته، وعادي في كل زمن في ناس في قلوبها شر وتعمل أعمال تفريق وتمريض وايذاء للناس ولاتحترم قدسية المكان ولا الزمان، الموضوع مش مفاجأة ولا جديد ولا حاجة.
