EN
نجت الإعلامية والمحامية والكاتبة، أميرة بهي الدين من واقعة احتراق منزلها بسبب “المخدة الكهربائية” التي كانت بالقرب منها أثناء نومها في ساعات الليل كاشفة تفاصيل ذلك عبر صفحتها على موقع التواصل الاجتماعي “فيسبوك".
وقالت الإعلامية أميرة بهي الدين، مقدمة برنامج "افتح باب قلبك" المذاع عبر قناة “CBC”: “صحيت الساعة ٦ الصبح علي ريحة غريبة، وشفت دخان بسيط وسط الضلمة، اتحركت في السرير حسيت بسخونية غريبة جداااا”.
احتراق بسبب المخدة الكهربائية
وأضافت الإعلامية أميرة بهي الدين: "أنا بانام وحاطة علي طرف السرير جنبي بقالي كذا يوم، اللي بيسموها " مخدة كهرباء" صغيرة، بادفي عليها ايدي وأنا بانام، حسيت بسخونية وريحه غريبة ودخان، فتحت النور، لقيت " المخدة الكهرباء “ساحت واسودت واتحرقت ولزقت في اللي تحتها وفوقها وحرقت البطانية تحتها وفوقها والملاية اتحرقت والمرتبة اتلسعت وريحه الشياط رهيبة”.
وتابعت المحامية أميرة بهي الدين: “طبعا فزيت فصلت عنها الكهرباء وشلت كل حاجة بعيد عن بعض لانهم كانوا كلهم سخنين وبيسحيوا ويحرقوا بعض و...... فتحت الشباك و... ربنا نجاني من اصغر الشرر واكبر الحرائق ومن اللي معرفوش..”.
نجاة إعلامية من الاحتراق
وواصلت الكاتبة الشهيرة أميرة بهي الدين: “سبحان من صحاني قبل مالدنيا تزيد عن كدة، سبحان من نجاني من شر أكبر ومن الكهرباء اللي سيحت المخدة الكهربائية وحرقت البطاطين والملاية ولسعت المرتبة ، سبحان من نجاني من الدخان البسيط والريحة الرهيبة ... فَاللَّهُ خَيْرٌ حَافِظًا وَهُوَ أَرْحَمُ الرَّاحِمِينَ”.
ولفتت المحامية أميرة بهي الدين في منشور لاحق: “بشكر ربنا علي ستره ورحمته والحمد لله الف حمد والف شكر، واني صحيت قبل مااتعرض للي مقدرش عليه وربنا انقذني من اللي مااعرفوش ولا قبل لي بتحمله ومواجهته ، وارجوكم ماتستعملوش الحاجات دي لا وانتم صاحيين ولا انتم نايمين، كلها غالبا صناعات ردئية تفتقر اي ضمانات امان ، وسبحان الستار القادر الحافظ اللي سبغ ستره ورحمته عليا ، وانا نايمة مش دريانة ولا حول لي ولا قوة ، وهو البصير الذي لاينام”.
وأضافت: “اتخضيت جداااا ولسه مخضوضة لكن حامدة ربنا وشاكراه علي كل نعمه وربنا يكفينا ويكفيكم شر المستخبي اللهم امين ..عمري ماكنت لوحدي ابدا، لان ربنا معايا علي طول، قوته بتسندني ، وايده في ضهري ، ورحمته بتسترني وتهون عليا ..يالله ياولي الصابرين ... مددددد”.
وأكدت أميرة بهي الدين في أحدث منشور لها حاليا: "عمر جديد ❤️❤️، انا اتكتب لي عمر جديد ياسعاد ⚘️الف حمد والف شكر لك يارب علي كل نعمك وفضلك ولطفك وكرمك وسترك والحمد للهولا حول ولا قوة الا بالله العلي العظيم ⚘️، مددددد ياصاحب المدددددد ⚘️".
