EN
تحدث محمد الدماطي عضو مجلس ادارة النادي الأهلي، عن سر يكشفه لأول مرة وبدايات تحقيق حلم إنشاء ستاد الأهلي الجديد.
وكتب الدماطي عبر فيسبوك: "هقول علي قصة عمري ما قولتها قبل كده، أول مرة قعدت مع الكابتن على الانتخابات كان في يوليو ٢٠١٧، كان اللائحة الاسترشادية نزلت وأعلن انه هينزل انتخابات، أنا اللي بادرت بالمكالمة وعملت بريزنتيشن كاملة عن نقدر نعمل ايه في النادي، و كيفية تنمية الموارد، عملت الكلام ده و أنا مجرد مشجع بيحلم انه يكون موجود في قائمة محمود الخطيب".
وتابع: “ بعد ما خلصت قولتلو انا شايف عشان الناس تصدق كل الوعود الانتخابية دي لازم نقول ان استاد الاهلي هيبقي صعب في المرحلة الحالية ومنقدرش نوعد بحاجة عنه، كان ماشي معايا طول القعدة كويس ومبسوط لحد الحتة دي، رد عليا بزعل، بس ده حلم الناس كلها و حلمي أنا شخصيا مقدرش أبدا احبط الناس وان شاء الله هنعملوا”.
وأضاف: “وعلي مدار السنين اللي فاتت عمر ما الحلم ده غاب عنه وكان على طول مركز في تحقيقه وده بيعكس اد اي الاستاد كان الهدف الاكبر، و ان شاء الله ٤ سنين من انهارده يبقي حاضر أول مباراة علي الاستاد الجديد كرئيس للنادي الأهلي”.
وأعلنت القلعة الحمراء، عن تفاصيل مشروع ستاد الأهلي حيث يعد استاد الأهلي، من أهم و أكبر المشروعات الرياضية خاصة أنه يمثل نقلة نوعية للنادي وجماهيره، ويأتي المشروع ضمن خطة الأهلي لإنشاء مدينة رياضية متكاملة، تماشياً مع رؤية النادي المستقبلية.
استاد الأهلى الجديد
ومن المقرر أن يتسع استاد الأهلي لـ 42 ألف متفرج ويستغرق بناؤه 4 سنوات، ويجمع هذا الاستاد الحداثة والوظيفية، حيث ستكون المدرجات قريبة من الملعب دون مضمار، الأمر الذي يتيح للجماهير التفاعل المباشر مع اللاعبين.
كما أن السقف المغطى بالكامل يحمي الحضور من الأمطار والظروف الجوية المختلفة، مما يجعله صالحًا للاستخدام في جميع الفصول.
ويتضمن مشروع استاد الأهلي مرافق مميزة من بينها 80 جناحًا فاخرًا و72 جناحًا لكبار الشخصيات، إلى جانب كبائن VIB، مطاعم، كافيهات، وشاشة دائرية عملاقة في سقف الملعب تضيف لمسة عصرية للتجربة الجماهيرية.
