EN
تحدث محمود الخطيب رئيس مجلس إدارة النادي الأهلي خلال الحفل التاريخي للأهلي في معبد حتشبسوت، بمدينة الأقصر، الذي كشف خلاله النادي عن تفاصيل استاد الأهلي.
وقال الخطيب في كلمته: «النهاردة يوم من أسعد ايام حياتي ، كل واحد مثل النادي الاهلي من 1907 ليه دور في اليوم دا ، اللي ليه فضل بعد ربنا سبحانة وتعالى في اللي بيحصل دا جمهور الاهلي ، كلنا زائلون والجمهور هو اللي بيتوارث حب ودعم النادي».
وأضاف محمود الخطيب: «أطالب الجميع بتقدير النادي الأهلي، يستحق التقدير من الجميع، مش بنتكلم كتير، عايز أشكر أعضاء مجلس الإدارة، كلهم بيشتغلوا بصمت، لما حد كان بيتطاول كنت بقولهم نشتغل بس، نرد بالنجاحات والشغل بس، حابب أشكر جماهير النادي الأهلي الشريك الأساسي من ١٩٠٧ لحد النهاردة انتوا اللي دايما في ضهر الأهلي».
وتابع محمود الخطيب: «كنا بنتمنى أن يكون الكأس ليه صورة مع الرئيس عبدالفتاح السيسي ولكن كان منشغل بأشياء مهمة وهي الأحداث الحالية ، إحنا كلنا متألمين جدًا ، وخلوني أتكلم عن الناس اللي كانت بتتكلم عن حقوق الإنسان هما فين ؟ مشافوش الإنسان واللي حصل فيه الفترة اللي فاتت ؟ ، أنا بحيى الرئيس عبدالفتاح السيسي والدولة المصرية لموقفها من رفض تهجير أهلنا في غزة دا موقف تاريخي».
الشغل هو الرد
وأوضح الخطيب: «كنت دايمًا بطلب من مجلس الإدارة نشتغل بس ومحدش يرد ، الشغل هو الرد والإنجازات هو الرد والنجاحات هي الرد».
وقال الخطيب: «الأهلي حصل على العديد من البطولات وشارك في العديد من بطولات كأس العالم في أخر 7 سنين ، على مستوى القاري إنك توصل خمس مرات نهائي أفريقيا وتحقق أربع بطولات، وليه بتكلم على أخر 7 سنين ، عشان أثبت إنك مش بس وصلت للانجازات إنت حافظت على الإنجازات دي ووصلنا للقمة وحافظنا عليها، إحنا منظومة بنبني ونتحد مع بعض وهي دي عظمة النادي الأهلي».
وأضاف: «النادي الأهلي نشأ على الوطنية وبيشتغل دائما وبلده قدام عنيه وبيحاول يكون مخلص جدا ونساهم في عظمة بلدنا، الوطنية مش كلام، الوطنية عمل وإخلاص مش بس في الرياضة في كل المجالات».
