ناقد: حتى لا نُزيف التاريخ.. أبو جريشة وكارتيرون اكتشفا مرموش وليس ميدو

شارك الناقد الرياضي خالد طلعت منشوراً بشأن عمر مرموش وميدو عبر صفحته على موقع التواصل الاجتماعي فيسبوك.

وكتب خالد طلعت: "حتى لا نُزيف التاريخ .. أبو جريشة وكارتيرون هما من اكتشفا عمر مرموش وليس ميدو.

من اكتشف عمر مرموش؟

وأضاف: ناس كتيرة بتتكلم في موضوع عمر مرموش ومين اللي اكتشفه ومين أول واحد صعده للفريق الأول في وادي دجلة ومين أول واحد لعبه ماتش رسمي مع دجلة في الدوريل.. لأسف الشديد ناس زملكاوية كتير بينسبوا الفضل في الموضوع ده لأحمد حسام ميدو والكلام ده غلط تماما وغير صحيح ومينفعش ان حد يزيف التاريخ.. رموش أول واحد اكتشفه كان الكابتن الكبير المخضرم علي أبو جريشة ، وأول مدرب اكتشفه وصعده للفريق الأول للتدريب ولعبه كمان أول ماتش في الدوري كان الفرنسي باتريس كارتيرون، مش ميدو خالص.

وتابع: ميدو جه الموسم اللي بعديه وكان already مرموش اتصعد للفريق الأول ولعب ماتشات وبالتالي كان موجود في التدريب مع باقي اللاعيبة وبيلعب عادي فميدو مكانش ليه أي دور في اكتشافه او تقديمه للناس.. رموش بنفسه حكى الحكاية دي ان كارتيرون أول مدرب صعده بناء على رؤية علي أبو جريشة، وكارتيرون بنفسه أكد الكلام ده برضه بالظبط.

واختتم: فيه صورة فيها أول ماتش لعبه مرموش في الدوري كان يوم 8 يوليو 2016 (كان مرموش عنده 17 سنة) وكان أمام الاتحاد السكندري وكان كارتيرون هو المدرب ، ونزل مرموش بديل في الشوط التاني وكمان مرموش في أول ظهور ليه في الدوري صنع هدف الفوز لدجلة في الدقيقة 79 اللي سجله حسام عرفات وفاز دجلة على الاتحاد 3-2 والماتش ده كمان شارك فيه محمد شريف ومحمد هلال كبدلاء مع وادي دجلة في الشوط التاني".