EN
أشادت الفنانة داليا البحيري بفيلم “ سنو وايت ”، والذي أقيم عرضه الخاص ، ليلة أمس في احدي السينمات بالشيخ زايد.
ونشرت داليا البحيري عبر صفحتها الرسمية علي موقع إنستجرام قائلة: امبارح حضرت العرض الخاص لفيلم سنو وايت.. حقيقي استمتعت جدا بكل لحظة وكل كادر في الفيلم.. فيلم جميل بيقدم رسالة مهمة تدعو للتفكر والتأمل تدعو لتقبل الآخر وعدم التنمر علي خلق ربنا.. رسالة انك لازم تتقبل نفسك وتحبها لأن دي الطريقة اللي تخلي غيرك يقدرك ويحبك.. باختصار فيلم ملهم وروحوا شوفوه.
وأضافت: حتتبسطوا جدا.. مريم البطلة مع انها بتقف قدام الكاميرا وتمثل لأول مرة إلا انها معبرة جدا وشاطرة وتدخل القلب بدون استئذان أما تغريد المخرجة فأنا الحقيقة منبهرة بيها لأنها شاطرة عندها إيقاع ووجهة نظر وكادراتها تحفة مفيش مشهد بيعدي كده.. الكاميرا بتتكلم تعبر عن هي عايزة تقول ايه في كل مشهد .
وتابعت داليا البحيري : مخرجة ليها مستقبل كبير.. تحية كبيرة لمنتج العمل اللي تحمس للفيلم وتحية كبيرة لكل النجوم الكبار اللي شاركوا في الفيلم واللي كل واحد فيهم بطل في السينما يشيل فيلم لواحدة بس مشاركتهم تدل علي فنانين واعيين.. نجوم بدرجة فنان.. شكرا شكرا علي هذا الفيلم.
تدور قصة فيلم سنو وايت بطولة مريم شريف حول قوة الفتاة المصرية التي تبحث عن الحب والزواج والاستقرار الفيلم من إخراج تغريد أبو الحسن.
الفيلم يضم مجموعة من أبرز النجوم المصريين، بينهم: الفنان محمد ممدوح، والفنان كريم فهمي، والفنان محمد جمعة، والفنان خالد سرحان.
