EN
التقى الرئيس عبد الفتاح السيسى مع طلبة الكلية الحربية وقال إنّ تكلفة تطوير قطاع النقل في مصر 2 تريليون جنيه، مواصلا: «عشان أقولكم ممكن يبقى عندنا شبكة مواصلات وسكك حديدية ومترو أو حتى أتوبيسات ترددية، كان لابد أصرف 2000 مليار جنيه».
وأضاف الرئيس السيسي،«معملناش حاجة جديدة عشان إحنا عاوزين نعمل حاجة جديدة، لكن مكانش عندنا، الناس مهم تعرف إني بعمل عشان معنديش مش عشان الزيادة يعني».
وتابع: «انتوا مشفتوش القاهرة ومحستوش بيها لأن المسألة فيها اتحلت، لكن لو أنت شفت القاهرة في عامي 2011 و2012 وسبتها أنا وعشت معاكم زي ما هي كده، كان زمانها جراج، لكن حد يعرف كم بلغت تكلفة البنية الأساسية؟! مثل شبكة الطرق والنقل والمطارات والكهرباء والمياه والزراعة والمدارس والجامعات؟! هل حد يمكنه تقدير هذا الرقم؟! هل يعلم أحد إذا كانت تكلفة النقل تريليوني جنيه؟! الكهرباء كم؟! زيهم .. حاولنا حل المسألة بعلم وخطة وتضحية وإلا مش هنخرج من اللي إحنا فيه ده أبدا».
صندوق النقد
وقال الرئيس عبد الفتاح السيسي، إنّ الدولة المصرية فقدت 7 مليارات دولار دخل مباشر من قناة السويس خلال الـ11 شهرا الماضية، ورغم ذلك، أعلن صندوق النقد الدولي أن المسار الاقتصادي في مصر جيد.
وأضاف «كان يمكن ضخ هذا المبلغ في قطاعات كثيرة بالدولة المصرية، وهو يقدر بـ350 مليار جنيه، وهذه آثار الحرب».
وأوضح الرئيس: «نستهلك 20 مليون طن سنويا من القمح، ننتج نصفها ونستورد النصف الآخر، وهناك شيء آخر، منذ 50 عاما كانت الرقعة الزراعية في مصر تبلغ 6 إلى 7 ملايين فدان، وكان عدد السكان نحو 30 مليون نسمة، بمعدل ثلث فدان للفرد، لكن الآن لو أن لدينا 10 ملايين نسمة، لعدد سكان سنقول إنه 100 مليون نسمة، فإن هذا المعدل سيبلغ عُشر فدان لكل مواطن».
وتابع: «ليه أيام محمد علي وبعد كده كانت الظروف الاقتصادية للبلد أفضل من دلوقتي؟، لأن ساعتها كان عنده حوالي 5 ملايين فدان لـ4 ملايين مواطن مصري، وبالتالي، كان لكل إنسان ما معدله فدان واحد، وطلباته كانت متقضية من جوه مصر مثل القمح والذرة والقطن، وكانت بيوت أهلنا في الريف عبارة عن مشروعات صغيرة منتجة، مثل رءوس المواشي، وكل ما احتياجنا للدولار بيزيد يكون له تأثير غير جيد على اقتصادنا، ولو احنا كمهتمين مش فاهمين كل ده هتبقى حاسس إن اللي قدامك مبيعملش شغله ومقصر وظالمك وظالم ظروفك وبيقسى عليك، ولو فهمت هتقول ربنا يساعدك».
