نشرت الصفحة الرسمية لرئاسة مجلس الوزراء آليات تطبيق منظومة تشغيل الهواتف القادمة من الخارج ، وننشرها كما يلي في صورة سؤال وجواب: 

 1- هل ممكن الحصول على إعفاء بعد خروجي من المطار لموبايل شخصي جبته معايا من الخارج؟

لا يمكن تطبيق الإعفاء إلا داخل الدائرة الجمركية من خلال مأمور الجمرك وده بيكون بإثبات ختم الوصول وقبل خروجك من صالة الوصول في المطار أو المنفذ اللي وصلت من خلاله.

2- ما هو (الرقم التعريفي (IMEI) للموبايل وإزاي أطلعه؟

(الرقم التعريفي (IMEI) يعتبر كود هوية دولية خاص بكل جهاز مكون من 15 رقم الجهاز اللي بيدعم أكثر من شريحة بيكون ليه أكثر من رقم تعريفي بنفس عدد الشرائح اللي بيدعمها (جهاز بشريحتين هايكون ليه 2 رقم تعريفي)، تقدر تشوف الأرقام التعريفية لجهازك من خلال طلب الكود #06#* أو على علبة جهازك الأصلية.

3- ما هي الإعفاءات المسموح بها إذا كنت شغال بشريحة غير مصرية؟

أي مستخدم بيشغل موبايله بشريحة غير مصرية لا تنطبق عليه هذه الإجراءات خلال فترة تشغيله على نظام التجوال الدولي أيًا كانت مده إقامته في مصر.

4- ما هي الإعفاءات المسموح بها إذا كنت قادم من الخارج ؟

إذا كنت قادم من الخارج يمكنك الإفصاح عن أجهزتك والحصول على الإعفاء لجهاز موبايل واحد فقط للاستخدام الشخصي وذلك فقط داخل الدائرة الجمركية عند الوصول.

5- ما هي الإعفاءات المسموح بها إذا اشتريت موبايل واستخدمت فيه شريحة مصرية (للمقيمين خارج مصر)؟

أي مصري أو أجنبي عند تشغيل موبايله لأول مرة بشريحة مصرية داخل مصر بيكون ليهم مهلة مدتها ٩٠ يوم سماح متصلين أو متقطعين كل سنة بيشتغل خلالها الموبايل بشكل طبيعي.

6- موبايلي بيدعم أكثر من شريحة بس كنت شغال بشريحة واحدة قبل تاريخ إطلاق المنظومة، هل مطلوب أدفع أي رسوم عند تشغيل الشريحة الثانية بعد تاريخ إطلاق المنظومة؟

مش هيكون مطلوب سداد أي رسوم عند تشغيل الشريحة الثانية للموبايل اللي تم تشغيله بالفعل قبل تاريخ إطلاق المنظومة إذا كان فيه رقم تعريفي واحد على الأقل مسجل قبل تاريخ 1 يناير 2025 يعتبر الموبايل مفعل ومش مطلوب سداد أي رسوم عنه.

7- هل في أي جهة ممكن تتصل تطلب مني بيانات أو معلومات علشان تسجل الموبايل الخاص بيا من خلالهم؟

مفيش أي جهة هتتصل تطلب منك بيانات من خلال أي وسيلة اتصال حافظ على بياناتك الشخصية.

8- هل محتاج أسجل الموبايل اللي هشتريه من وكيل أو موزع معتمد داخل مصر؟

التسجيل مسئولية الوكيل أوالموزع المعتمد داخل مصر اتأكد من خلال تطبيق تليفوني أنه متسجل ولا يستحق رسوم واتأكد من الحصول على فاتورة ضريبية مسجل بها (الرقم التعريفي IMEI Number المكون من 15 رقم).
 

9- إزاي أكمل إجراءات التسجيل وسداد الرسوم ؟

تقدر تحمل تطبيق تليفوني من خلال الموقع الرسمي www.telephony.gov.eg أو من خلال متاجر التطبيقات وتستخدم خدمة التسجيل وسداد الرسوم، اتبع الخطوات لإدخال الأرقام التعريفية للجهاز واستكمل خطوات السداد وبكده هيتم تسجيل تليفونك خلال دقائق.

10- ايه الاحتياطات اللي مفروض المواطن يعملها عند شراء موبايل جديد؟

المواطن لازم يتأكد من الحصول على فاتورة ضريبية متسجل فيها جميع الأرقام التعريفي للموبايل (الرقم التعريفي IMEI Number المكون من 15 رقم)، استخدم تطبيق "تليفوني" للاستعلام عن الموبايل الجديد قبل شرائه لمعرفة حالة تسجيل الموبايل وهل في أي رسوم مستحقة عليه والتأكد ان جميع الأرقام التعريفية الخاصة به مسجلة على التطبيق.

11- إيه هي القنوات المتاحة لسداد الرسوم؟

متاح الدفع من خلال تطبيق "تليفوني" على الموبايل أو أثناء تواجدك بالدائرة الجمركية داخل المطار وأنت جاي من الخارج لا تقوم بالسداد إلا من خلال تطبيق تليفوني أو عن طريق القنوات الرسمية المحددة على الموقع الرسمي: www.telephony.gov.eg

12- هل لازم أثبت موبايلي وأنا مسافر للخارج؟

مش محتاج تثبت موبايلك على جواز سفرك إذا كنت مسافر إلى الخارج.

13- إيه موقف الموبايل اللي شغال في مصر قبل تاريخ بدء تطبيق الإجراءات؟

مش مطلوب تسجيل الموبايل اللي قام المواطن بتفعيله قبل تاريخ إطلاق المنظومة، والإجراءات مش هتطبق بأثر رجعي الإجراءات الجديدة بتسري فقط على الموبايل اللي بيتم تشغيله لأول مرة داخل مصر بشريحة مصرية بدءًا من ١ يناير ٢٠٢٥.