وقفت علياء أمام محكمة الأسرة في الكيت كات طالبة الخلع من زوجها بعد خلافات استمرت لمدة 18 شهرا طلبت خلالها الطلاق أكثر من مرة إلا أن زوجها رفض فما كان منها إلا أن لجأت إلى محكمة الأسرة طالبة الخلع منه.

سردت علياء قصتها أمام محكمة الأسرة قائلة إنها تزوجت قبل 4 سنوات من زوجها كريم والذي لم تتضح شخصيته لها قبل الزواج، وكان شخص آخر حتى أنها قالت «اللي أنا عايشة معاه دلوقتي واحد معرفوش ولا عمري شوفته حد تاني غير اللي اتجوزته».

وقالت علياء «كريم اتحول بعد الجواز وبقى شخص تاني كل شوية عصبية وخناقات على حاجات تافهة مبقاش شايفني حلوة، كل شوية شتائم وسب وضرب وأسلوبه بقى غريب جدا، لدرجة أني مبقتش عارفة اتعامل معاه».

وتابعت علياء «افتكرت والعياذ بالله أن حد عاملي حاجة وحشة أو سحر والحاجات اللي بيقولوا عليها لأن الشخص ده مبقاش هو اللي حبيته واتجوزته، اتحول 360 درجة ومبقاش هو كريم، الخناقات بيني وبينه بقت على كل كبيرة وصغيرة».

أكملت علياء «في النهاية أنا تعبت من المشاكل دي وبالذات في أخر سنة ونص لما الخناقات بيني وبينه كترت بشكل مستفز ومبقتش عارفة أعيش معاه وساعتها طلبت الطلاق منه أكتر من مرة لكنه كان بيرفض وبيقول مفيش طلاق».

اختتمت علياء حديثها قائلة «في المرة الأخيرة قامت بيني وبينه خناقة بسبب هدوم وحاجات هبلة جدا وطردني من البيت وروحت عند أهلي وبعت له رسالة أنه يطلقني ولما رفض روحت محكمة الأسرة طلبت الخلع منه».