تنظر محكمة جنوب الجيزة، بعد قليل، محاكمة المخرج عمر زهران بتهمة سرقة مجوهرات زوجة المخرج خالد يوسف وفق الاتهامات الواردة في أمر الإحالة.

وقال المخرج عمر زهران في الجلسة الأولي للمحاكمة: خالد يوسف قالي فيه مجوهرات كتير ضايعة من مراتي قلتله مراتك مهملة وكلنا عارفين كده وانت بتقول ان الحاجات دي كانت في شقة الفورسيزون دي شقة عبارة عن مخزن اكيد الحاجة دي ضايعة وسط الكركبة دور عليها كويس.

واضاف: اتفاجئت ان شاليمار طلبت مني اروح ادور معاها رفضت وخالد يوسف كرر الطلب رفضت للمرة الثانية مكنتش فاهم اصرارهم اني ادور معاهم على حاجات ضايعة في شقتهم الخاصة وروحت مرة دورت مع شاليمار ومعاها 2 شغالين وساعتها خالد يوسف كان مصمم يعرف احنا دورنا فين بالضبط قلتله على كل الاماكن الا غرفة كانت مقفولة".

قرر خالد يوسف انه يدور في الغرفة دي بس أصر اني اروح ومش فاهم ليه وكلمني وانا بصلي الجمعة وبعد عدة اتصالات منه روحت وانا لابس جلابية الصلاة وبدأت أدور في الغرفة المقفولة لحد ما فتحت دولاب لقيت شنطة في وشي فتحناها كانت مليانة مجوهرات".

وأضاف المخرج قائلا: ولما شاليمار شافت الحاجات دي طلعت غير الحاجات اللي قالت اتسرقت يعني انا لو عايز اسرق حاجة ما الشنطة دي كانت ادامي وفيها ساعة الملكة فريدة اشترتها شاليمار من مزاد علني، وكمان شاليمار بتقول اني سرقت منها حاجات بـ 250 مليون جنيه ولما معرفتش ابيعها عشان هي حاجات غالية ونادرة رجعتلها حاجات بـ 200 مليون واحتفظت بمجوهرات بـ 50 مليون جنيه.

ووجه حديثه للقاضي قائلا: معلش يا فندم هو انا حمـ.ـار عشان اعمل كده ارجع حاجات سرقتها وافضح نفسي طيب ما كنت رميتها في النيل".

وأكد المخرج الشهير قائلا:"كل الناس واصحابنا عارفين ان شاليمار الشربتلي ماشية ورا المشعوذين والدجالين وهي قالتلي ان واحدة مشعوذة فتحت الكوتشينة وقالتلها ان انا اللي سرقتها وكانت عايزاني افتح المندل وطلبت مني اجيب واحد مبروك يساعدنا في البحث عن مجوهراتها.. هو ده كلام يتهموني على اساسه واتحبس وانا راجل مريض قلب وسكر وعجوز كمان يعني اتحبس بسبب مشعوذة وراجل مبروك".

خلال ساعات المحاكمة لم تتوقف المفاجآت الى هذا الحد حيث تقدمت الفنانة هالة صدقي كشاهدة نفي الى المحكمة وأيضا الاعلامية بسمة وهبة حيث اكدت كل منهن ان المخرج قمة في النزاهة والأمانة وصديق شاليمار الشربتلي وخالد يوسف لسنوات طويلة تخطت 20 عاما وجميعهم اندهشوا من اتهامها له بخلاف ما فجرته هالة صدقي بأن احد الاشخاص شاهد كمية كبيرة من المجوهرات في شقة مفروشة استاجرها المخرج خالد يوسف وان شاليمار عندما علمت بذلك اتصلت بهالة صدقي سبتها معتقدة انها من تروج ذلك وكان المخرج الشهير حاضرا لتلك الجلسة وعندما طالبته هالة صدقي بالشهادة معها على سب شاليمار لها فوجئ باتهام زوجة خالد يوسف له بسرقة مجوهراتها التي ابلغت باختفاءها منذ عام ونصف".