EN
التقى موقع “صدى البلد”، طالبة الزمالك سلمى نادر، صاحبة واقعة الاحتجاز في المدرسة، والتي كشفت كافة التفاصيل عن الواقعة.
طالبة الزمالك تشرح لـ صدى البلد أسباب منعها من حضور الحصص
وقالت طالبة الزمالك، لـ “صدى البلد”، “القصة بدأت لما روحت حفلة خاصة ملهاش دعوة بالمدرسة، وجيت أروح المدرسة وقبل ما اليوم يبدأ طلعوني وقالولي ممنوع تحضري حصص وحطوني في المعمل، وقالولي مفيش حضور، والكلام ده كان قبل طابور الصباح حتى”.
وتابعت طالبة الزمالك، “قالولي صاحبة المدرسة قالت مفيش حضور وفضلت قاعدة طول اليوم في المعمل، وقالولي استني قرار، وفضلت أروح كذا يوم استنى قرار مفيش بردوا أي حاجة، وأنا قالولي الحفلة اللي أنتي حضرتيها هي السبب، وأنا مكنتش فاهمة ايه اللي بيحصل”.
وأكملت طالبة الزمالك، "كل ما كنت بسأل محدش كان بيرد عليا، وكل كان بيقول ده قرار صاحبة المدرسة، أنتي ممنوعة من الحضور، وكنت بقعد اليوم الدراسي كله في المعمل، وكنت بروح الحمام وبرجع، بس كانوا بيمنعوا أصحابي من التواصل معايا، وأوقات بينزلوني وأوقات لا".
وأكدت طالبة الزمالك، “كنت بروح المدرسة أدخل للمدير أعرفه أني جيت يقولي القرار في أيد صاحبة المدرسة، ومفيش حاجة في أيده ويقولي استني في المعمل وأفضل قاعدة طول اليوم من غير أي حاجة، وحسيت أني مظلومة ومضطهدة وأنا كان معايا ناس تاني في الحفلة دي ودخلوا المدرسة عادي ومتأكدة أن ربنا هيجيب لي حقي”.
واستكملت طالبة الزمالك، “مكنش ليا مكان في المدرسة وواخدين قرار أني مش موجودة وحاولنا ندفع المصاريف رفضوا وتعنتوا معانا بدون أي سبب من غير ما أعمل حاجة وأنا معروفة في المدرسة دي من سنين والمدرسة ما كلمتش والدي أو والدتي وفي مشكلة معاهم للتواصل مع الأهالي من زمان".
واختتمت طالبة الزمالك عن قصتها مع مدرستها، “إحنا مستغربين أن ده حصل معايا وأنا بحب مدرستي جدا وكان عندي طاقة لأول يوم مدرسة، واخترت لبس المدرسة أنا وأصحابي نظمنا اللبس وكل حاجة عشان أول يوم دراسة، لكن في النهاية مدخلونيش وحبسوني في المعمل”.
