EN
التقى موقع صدى البلد بأسرة “دكتورة” القاهرة الجديدة والتي راحت ضحية حادث مروري حيث اصطدم بها شابان يستقلان سكوتر داخل القاهرة الجديدة.
أسرة دكتورة القاهرة الجديدة تكشف تفاصيل وفاتها
قالت شقيقة ضحية القاهرة الجديدة "كان فيه شابين بيلعبوا بـ سكوتر وواخدين على الخروج بالاسكوتر بتاعهم، وكانوا عاملين زي سباق، وبيجروا في الشوارع بيهم وناس كتير بتعمل الحاجات دي، لدرجة أن فيه ناس بتأجر الاسكوترات بالبطاقة بس.
وتابعت شقيقة ضحية القاهرة الجديدة : بيعرف يسوق أو مابيعرفش معاه بطاقة بيأجر وبعدها بيسوق وتحسي أنك مش في مدينة سكنية، كأنك في منتجع سياحي، وحادثة أختي في المنطقة السكنية كانت رايحة تشتري دواء الساعة 9.30 بالليل وهتتمشى شوية مع أختها الصغيرة.
وأكملت شقيقة ضحية حادث القاهرة الجديدة "وهي ماشية جنب الرصيف رايحة في طريقها مسافة 10 دقايق مشي من البيت، والحادثة حصلت الساعة 10 وحاولنا نتصل بيها الساعة 10.20 عشان نطمن لقينا التليفون فاصل والصدفة اختها وهي معدية جنب الحادثة الناس وقفتها قالت لها مش معاكي اسعافات أولية.
وأكدت شقيقة ضحية حادث القاهرة الجديدة، أن أختها عدت بالصدفة وشافت أن واحد منهم سليم والتاني مصاب، ولما سألوها مكنتش تعرف ان أختها هي اللي ميتة في الحادثة وإحنا بندور عليها، الولدين خبطوها بالاسكوتر ومالك الأسكوتر بيقول إن صاحب ابنه سرق الاسكوتر، طيب إزاي اتنين تحت السن جايين من مدينة نصر للقاهرة الجديدة محدش وقفهم.
وتابعت : أختي وقعت على دماغها وماتت في نفس اللحظة، وبيقولوا إن أختي توفت في وقتها، وإحنا مش عارفين ومحدش فكر يشوف البنت اللي خبطوها دي مين أو منين أو ساكنة فين، وأسرة المتهمين حضروا وخدوا ولادهم ومشيوا ومحدش سأل فينا.
أكملت شقيقة ضحية حادث القاهرة الجديدة: روحنا ناخد أختي من المستشفى لما عرفنا بالصدفة، اللي حصل مع أختي إهمال نتج عنه قتل، القتل الخطأ ده حد بيعدي الشارع لكن دي ماشية جنب الطريق وماتت جنب المسجد يعني مش في المنطقة الزحمة، منى الله يرحمها أختي الأصغر منّي وأنا قريبة منها جدا.
وتابعت: أنا متواجدة خارج مصر واتصلت بوالدتي وأختي وقالولي دي في الحمام، وبكلمهم أطمن عليهم وأطمن على ماما وهي كانت جميلة وبتضحك، وسلمت عليها ومكنتش أعرف إني بودعها، وكان نفسي تجيلي زيارة وكان نفسنا نروح ديزني سوا، ربنا يرحمها وتفرح في الجنة.
