هاجم وائل القباني، نجم الزمالك السابق، أحمد بلال، نجم الأهلي السابق؛ بسبب تصريحاته الأخيرة ضد فريق الزمالك قبل مباراة السوبر الإفريقي.

وقال وائل القباني، في تصريحات تلفزيونية “ما بحبش التصريحات التريند، التقييم حاجة، وإنك تسيئ لنادي الزمالك حاجة تانية، لازم تعرف إن الزمالك نادي كبير”.

وأضاف: “ماينفعش مثلًا النادي الأهلي مستواه يكون نازل في 5 أو 6 مباريات، وأقول ما يُروحش المباراة أحسن”، مضيفًا: “ممكن أقول الأهلي مش هيكسب وفقًا لأدائه في الفترة الأخيرة، ده أسلوب محترم”.

وتابع: “أنا اتعودت لما أتكلم على حد؛ أتكلم باحترام، مفيش حاجة اسمها تقول الزمالك ما يسافرش، مينفعش تقول الزمالك مش هيجيب رمية تماس، الزمالك نادي كبير، وعيب تقول كده”.

وواصل: “كلامك كلام تريندات، عيب اللي أنت بتقوله، أنا لما بتكلم على الأهلي؛ بتكلم باحترام، لما تيجي تتكلم على الزمالك؛ تتكلم باحترام، أيا كان مستواه”.

وأتم: "انا لما أتكلم عن الأهلي حتى لو مش في مستواه، هقول نادي الزمالك كفته أرجح بنسبة 70%، لكن ينفع أقول النادي الأهلي ميسافرش! هل دي قيمة النادي الأهلي؟ ودي برضه مش قيمة الزمالك".

كان أحمد بلال، قد قال في تصريحات عبر قناة "النهار": إن “مباراة السوبر الإفريقي أعتقد أنها ستنتهي قبل بدايتها لصالح الأهلي، في ظل مستوى الزمالك المتواضع للغاية”.

وأضاف “الزمالك بمستواه الحالي، أعتقد أنه لن يسدد كرة على العارضة حتى بالمباراة، ولو ده المستوى اللي هيلعب بيه المباراة؛ مش هيكون محتاج يسافر للسعودية عشان ما يخسرش بنتيجة كبيرة، ونسبة فوز الأحمر 90%”.