EN
حالة من النشاط الفني تعيشها الفنانة رانيا منصور، بعد نجاح مسلسل الوصفة السحرية، التي شاركت في بطولته مؤخرا، بالإضافة إلى بدء تصوير مشاهدها في مسلسل رقم سري، مع الفنانة ياسمين رئيس والفنان صدقي صخر.
وفي حوار مع موقع صدى البلد الإخباري، كشفت رانيا منصور، كواليس أعمالها الفنية وردود الأفعال التي تلقتها حول شخصية «هالة» في مسلسل الوصفة السحرية، وغيرها من الكواليس والأسرار.
في البداية قالت الفنانة رانيا منصور، إن ترشيحها في مسلسل الوصفة السحرية، جاء من خلال شركة الإنتاج وعرضوا عليها شخصية هالة -وهي شخصية أساسية لكن تظهر في الحلقة 15- فطلبت قراءة السيناريو فأعجبها الدور وتحمست على المشاركة بالمسلسل، لافتة إلى أن كواليس التصوير جاءت جيدة خاصة أن الأبطال معظمهم من الفنانات النساء، فقالت: «المسلسل كله ستات شغلي أكتر كان مع البنات كلهم اللي في المسلسل يعني مع شيري وبسمة وهيدي كرم وكارولين عزمي ولقاء سويدان يعني كلنا بصراحة كنا بنتجمع في معظم المشاهد فكانت بتبقى لذيذة قوي الكواليس».
الوصفة السحرية لنجاح العلاقات
وحول ردود الأفعال التي تلقتها على السوشيال ميديا، قالت رانيا منصور: «موضوع المسلسل لذيذ واجتماعي وفي نفس الوقت برضو كوميدي.. فدي حاجة الناس بتحبها بتتكلم عن العلاقات والمشاكل ما بين الأزواج بشكلها المختلف فكل دي حاجات بتجذب الناس إن هي تتفرج.. فالحمد لله يعني ردود الأفعال كانت لذيذة والمسلسل كان دمه خفيف والناس عاملة أدوارها حلوة.. وشخصية هالة اللي لعبتها كانت مستفزة طبعا إن هي بتحرض الستات على أزواجهم وبعدين بنكتشف الآخر إن هي نصابة فكانت شخصية برضو دمها خفيف بالنسبالي».
وحول رؤيتها للعلاقة بين الرجل والمرأة، قالت رانيا منصور: «مفيش وصفة سحرية نقدر نوصفها لكل الناس وتنجح العلاقات أعتقد لأن مش كل حد بيناسبه نفس الحاجات اللي بتناسب التاني يعني ممكن حاجات تبقى بتناسبني بس مش مناسبالك لكن المهم ان يبقى هم الاتنين متفاهمين لأن الزوج هو الشخص الوحيد اللي انت بتختاره.. ما حدش بيختار أمه ولا أبوه ولا حتى ولاده.. ربنا اللي بيبعتهم والشخص الوحيد اللي أنت بتختاره هو الزوج فطبيعي لازم يكون في تفاهم ما بين الاتنين وانسجام ما بينهم».
الست المستقوية
وحول رؤيتها لشخصية الست المفضلة (مستقوية أم لا)، أجابت رانيا منصور: «لأ طبعا مستقوية دي هتتحول لراجل على طول في العلاقة لازم يبقى فيه حدود بس في التعامل.. يعني كل واحد فيهم يحط للتاني حدود اللي بيضايقه واللي ما بيضايقهوش واللي بيبسطه علشان التاني يبقى فاهم.. لما بيحصل خلافات مسلا وكل واحد بيبقى متمسك بوجهة نظره لازم يبقى فاهم انه في حد تاني معاه في العلاقة فلازم يكون له اعتبار ويكون زعله له أهمية .. ولو طرف سمح للتاني إنه ييجي عليه ساعتها بيحصل مشكلة في العلاقة».
وحول رأيها في شخصية هالة التي لعبتها بمسلسل الوصفة السحرية، قالت رانيا منصور: «لو قابلتها في الحقيقة ههرشها طبعا».
أعمالها الفنية
وحول أعمالها الفنية المُقبلة، قالت رانيا منصور، إنها بدأت حاليا تصوير مشاهدها في مسلسل رقم سري مع الفنانة ياسمين رئيس والمخرج محمد عبد التواب (توبة)، لافتة إلى أنها بدأت التصوير منذ أسبوع وتقدم شخصية تُدعى ميرنا موظفة في بنك وشعر بالغير من زميلتها لقاء التي تلعبها الفنانة ياسمين رئيس، ثم يحدث اتهام وتتصاعد الأحداث بين الشخصيتين».
وتابعت رانيا منصور، أنها تظهر (ظهور خاص) في فيلم ريستارت للفنان تامر حسني، بشخصية أم لطفلة تعمل بالتمثيل في الأحداث.
صفاتها وصفات شريك الحياة
وحول حياتها العاطفية، قالت رانيا منصور: «معنديش مواصفات معينة لشريك حياتي لكن لازم نبقى متفاهمين.. وبصراحة يعني أنا الفترة دي مأجلة الموضوع ده لأني مهتمة أكتر بشغلي».
وحول تشابه شخصيتها مع برجها «الجوزاء» قالت رانيا منصور: «لا معنديش تحول في المود زي ما بيقولوا كده على شخصية الجوزاء.. بس أعتقد إن أنا مترددة وبزهق بسرعة».
