احتفل الفنان مجدى عبيد بعيد زواجه الـ 36 عبر صفحته على موقع التواصل الاجتماعى فيسبوك بعد خروجه من المستشفى في نفس اليوم عقب وعكة صحية تعرض لها.

وقال مجدى عبيد : “امبارح 30 أغسطس كان عيد جوازنا الـ 36 والنهارده هنبدأ السنة 37 في عمرنا مع بعض، وأنا امبارح ماعرفتش أنزل البوست ده لأن كان ليا نصيب أقضي اليوم ده معاكي في وسط ولادي وأحفادي وكنت خارج يومها من المستشفى”.

وأضاف مجدى عبيد : "وكان يهمني أطمن الأهل والصحاب اللي دعوا لي بالشفاء وكانوا دائمي السؤال عني سواء على الحاص أو الواتس أو سؤال زوجتي وأولادي، وأشكر للجميع محبتهم التي كانت دافع لي لتخطي أزمتي الصحية.

واوضح مجدى عبيد : "حبيبتي، زوجتي، أم العيال، أختي وفي أحيان كثيرة أمي، صاحبتي السيدة الفاضلة، نجلاء عبد السلام 36 سنة وإحنا مع بعض سند ودفا، على الحلوة والمرة، خضنا فيها انكسارات كثيرة وانتصارات عظيمة ولم نبالي للمحن بل كنا لها متصدين، أنتجنا خلالها أجمل زهراتنا على الإطلاق، أبنائي الثلاثة نديم البرنس، ونوار مجدي المزيكاتي عاشق الكمان -الرايق- وست البنات طالبة المعهد العالي للموسيقى العربية أكاديمية الفنون حبيبة مجدي العايقة، وأحفادي الثلاثة الجميلات.

وأشارت مجدي عبيد: وأم العيال وعهد الله ما هي نحنحة مني أو مراهقة عيل عالمعاش لكنها حقيقة، اللي تستحمل واحد زي حالاتي وفي عصبيتي، غبي أحيانا، وتستحمل جنونه كثيرا، بوز فقر، مضروب بالمسرح، وش معتقلات ومتعاص سياسة، والنعمة يتعملها تمثال واتعبد فيه اللي فاضل من عمري واشكر المولي عليه، أميرتي وسميرتي والسنين الأخيرة اللي أصابني فيها جلطات عدة ودخلت على إثرها العناية المركزة كثيرا ووقوفك بجاني سند وضهر تثبت أصالتك ومعدنك الفريد، فعلا الزوجة المحبة لزوجها وبيتها رزق، حبيبتي نوجة كل لحظة وإحنا مع بعض طالما فيا نفس داخل وخارج يا رب يا حبيبي دايمًا مع بعض طول ما أنا عايش.