أثارت الفنانة شيرين عبد الوهاب، الجدل مؤخرا بعد أزمتها مع شركة روتانا، وخرجت عن صمتها بمداخلة هاتفية مع الإعلامي عمرو أديب ببرنامجه "الحكاية" المذاع عبر فضائية "mbc masr"، متحدثة فيه أيضا عن مؤامرة ضدها وعلاقتها بطليقها حسام حبيب وصحتها.

وجاءت تصريحات شيرين فيما يلي:

هفضل أغني.. شيرين عبد الوهاب: مؤامرة معمولة عليا علشان أقعد في البيت

قالت الفنانة شيرين عبد الوهاب: “هناك مؤامرة معمولة عليا علشان أقعد فى البيت، وأنا مكنتش بتكلم وكنت قاعدة زى ست خيبتها والأن صوتي مش هيتقطع وهفضل أغني وراكبة القطر بتاعي ومحدش هيعرف يوقفه، خلاص أنا سكت كتير”.

وأضافت الفنانة شيرين عبد الوهاب: “أنا بناشد القضاء المصري زي ما اتحكم لروتانا بالغلط انهم ياخدوا مني 8 مليون بالسرعة دي، أنا كمان القضايا اللي رفعاها يتحكم ليا بسرعة لأني ليا حق”.

وتابعت الفنانة شيرين عبد الوهاب: “صحتي زي الفل وأنا فلة شمعة منورة وبحب جمهوري جدا وكتر خيركم وعلي دماغي اللي بتعملوا علشاني، وأنا ماضية دلوقتي مع شركة ربنا، وهو اللي ممشيني ومنجحني وواقف معي وأنا لا أحتاج شركات، ومبسوطة كدا، والكل يلزم حده ومحدش يجيب سيرتي أنا فنانة كبيرة".

شيرين عبد الوهاب: نفسي أجرب سجن النسا.. عمرو أديب: هو انتي ناقصة

قالت الفنانة شيرين عبد الوهاب: “أنا فنانة كبيرة أوي أوي وجمهوري كبير وهم اللي هيقف لكل ما أثير من جدال حولي، وأنا سجن النسا واحشني جدا وأنا مستعدة أتسجن عادي جدا وأنا مش فارقة معايا حاجة، وخليني يا أستاذ عمرو أقفل قبل ما اقول مصايب اكبر من كده”.

ورد عليها الإعلامي عمرو أديب: “أنتي ناقصة يابنتي، أنتي بتدوري على المشاكل، وسجن أيه يا شيرين لي دا كله، داانتي ممكن تبقي ملكة زمانك وتعملي فلوس أد الدنيا وتتجوزي وتخلفي وتكوني سعيدة”.

ومن جانبها، تابعت الفنانة شيرين عبد الوهاب: “قولهم هم يا أستاذ عمرو، وأنا هبقي كوين فى السجن”.

خدوا مني 8 ملايين جنيه|شيرين عبد الوهاب تفتح النار على روتانا ومحاميها

تحدثت الفنانة شيرين عبد الوهاب، عن أزمتها مع شركة روتانا، قائلة: “مع كامل إحترامي لكل من تكلموا فى الموضوع دا، قسما بالله العظيم كل كلامهم غلط حتي المحامي بتاعي، وأنا تعاقدت مع شركة روتانا علشان أنا مطربة دولية وعلى مستوي الوطن العربي، وروتانا واخداني نجمة الوطن العربي بعد ألبوم لازم أعيش”.

وأضافت: “العقد بيني وبين روتانا ينص على أن شيرين عبد الوهاب فى حال لم يتم عمل لها دعاية توازي حجمها دوليا وعربيا، يعتبر العقد فاسد، وأستأذنتهم خلال فترة كورونا بأغنية ومتعملهاش دعايا بخمسة جنيه، واغنية أخري نزلت ونجحت ولم يتم عمل لها دعاية أيضا”.

وتابعت الفنانة شيرين عبد الوهاب: “أتعلمت أسكت علشان بيتقال شيرين بتاعة مشاكل، ف ليه شيرين متبقاش شيك وتسكت، وهناك شخص مشيته لأنه حط أغنيتي فى أنغامي بدون علمي لأنه غلط أزاى يحط أغنيتي فى شركة منافسة مع روتانا ولا يوجد ورقة تنص على موافقتي على هذا الأمر”.

وعقبت: “تحدثت مع مدير روتانا فى مصر وقلت له أنه من حقه إرسال رسالة للشركة المعنية وتوقف الأغنية وتقاضيهم وتأخذ منهم تعويض بصفته مالك صوت شيرين فى هذا الوقت، وما حدث أنهم بعتولي أنا الإنذار وخدوا مني 8 مليون جنيه”.

شيرين عبد الوهاب: روتانا أمتنعت عن إستلام الأغاني لأنها تريدني حصري بالحفلات

تحدثت الفنانة شيرين عبد الوهاب: عن أزمتها مع شركة روتانا، قائلة: “ أنا أدور لي علي شركات أمضي معهم وأنا عندي شركة موجودة بالفعل والأغاني جاهزة، روتانا عايزة شيرين عبد الوهاب حصري، وعايزينها لحفلات اللايف، وكلمتهم كتير على أن الأغاني جاهزة بشهادة كل الناس، مسلمهاش ليه".

وأضافت الفنانة شيرين عبد الوهاب: “هو أنا ست غاوية مشاكل، مش كفايا المشاكل اللي كنت فيها، روتانا أمتنعت عن إستلام الأغاني لأنها تريد شيرين عبد الوهاب حصري فى الحفلات، يعني اللي عايز شيرين فى أى حفلة يسلم روتانا، وهذا لم يكن الإتفاق".

وتابعت شيرين عبد الوهاب: “مفيش الكلام بتاع الحفلات دا، دا رزقي ورزق عيالي، مش كفايا خدوا 8 مليون جنيه مني بالغلط دي فلوس عيالي، داانتوا متفقين عليا، وهم كانوا عايزين الشرط الجزائي وتعويض مني علشان يحلوا عني، قلتلوا أني هعمل اللي مفيش شركات تقدر عليه".

ربنا يوفقه.. شيرين عبد الوهاب تحسم الجدل حول علاقتها بحسام حبيب

تحدثت الفنانة شيرين عبد الوهاب، عن أزمتها بطليقها حسام حبيب، قائلة: “الحمد لله وربنا يوفقه ويسعده ويكرمه ويوفقني أنا كمان، ومش هقولك يسعدني وأنا قلبي وجعني من يومين علشان أنا مش مصدقة النجاح اللي أنا فيه، وقولت للدكتور ربنا كارمني أوي ألف حمد وشكر ليك يارب”.