EN
كواليس وتفاصيل مثيرة في قضية سيدة مستشفى شبرامنت المركزي، حيث انتهت أسرتها من تشييع الجثمان إلى مثواه الأخير، إلا أن كواليس الحادث حملت في مضمونها العديد من المفاجآت.
القصة الكاملة لـ واقعة سيدة مصعد مستشفى شبرامنت
قال ابن ضحية مصعد مستشفى شبرامنت المركزي “ والدتي دخلت المستشفى قبل الواقعة بأسبوعين وعملت تقرير على نفقة الدولة ولما جبت التقرير قالولي لأ وجالنا إشارة أنها تتنقل مستشفى أم المصريين ونزلت لمدير المستشفى قالي لازم تتحول قلت له الحالة صعبة ومينفعش تتنقل”.
وتابع ابن ضحية مصعد مستشفى شبرامنت المركزي، مدير المستشفى قالي العملية هتتكلف من 20 ألف لـ 25 ألف، والعملية دي كسر مفصل، قلت له أنا معايا قرار على نفقة الدولة عشان مش معايا فلوس هدفعني فلوس، قالي دي اللوائح والقوانين قلت له خلاص هتصرف وأجيب لك الفلوس قالي نص ساعة وهرد عليك.
واستكمل ابن ضحية مصعد مستشفى شبرامنت، قالي العملية هتتكلف 35 ألف جنيه، وجهزت له الفلوس واديتهاله رجعلي 25 ألف جنيه وقالي دول هياخدهم مسئول الشركة اللي هتورد المفصل، ومعايا ايصالات بكل الحاجات دي، ودخلت العملية فعلا وعملتها وخرجت منها زي الفل، الساعة 12 الظهر ودخلنا الأوضة لأن من شدة العملية خدت حقنة مسكنة ومحدش سأل فينا تاني ولا حد عبرنا".
وأضاف ابن ضحية مصعد مستشفى شبرامنت، "قالولنا هتنزل تعمل أشعة في الدور الأرضي روحنا عند الأسانسير قالولنا عطلان وهنبعتلك وبعتها بـ نص ساعة قالولنا اشتغلت وعايزين حد ينزل الحالة، ونزلت على السلم وابن خالي وأختي دخلوا الأسانسير معاها، واستنينا تحت وساعتها نزل الأسانسير ومفيش ثواني ولقيناه بيطلع لفوق لوحده.
واستطرد : أول ما طلعوا التروللي لقيناها اتزنقت في السقف ما بين الأسانسير والحيطة ونطقت الشهادة وماتت وقعدوا تلت ساعة مش عارفين يعملوا حاجة، ريحة شياط الأسانسير طلعت والكهرباء فصلت، وخدوها ودوها أوضة الرعاية كانت الرقبة مكسورة وخلصانة.
وتابع ابن ضحية مصعد مستشفى شبرامنت المركزي “أنا عايز حق أمي من أي حد مسئول عن الإهمال اللي حصل في المستشفى واللي اتسبب في اللي حصل لأمي ده”.
وقال محمد ابن شقيق ضحية مستشفى شبرامنت المركزي، والذي نجا من واقعة المصعد، أنه كان على علم بأن عمته ستدخل لإجراء عملية تغيير مفصل، وبعد الخروج من العمليات الدكتور قال هتعمل عملية.
وتابع ابن شقيق ضحية مستشفى شبرامنت المركزي “الممرضة جات قالت الأسانسير عطلان وهنستنى نص ساعة، وبعدها رجعت وبتاع الأمن قالها هدور الأسانسير نزلي الحالة وأنا هسحبه تاني، ودخلت أنا وبنت عمتي الأسانسير، هو دور واحد اللي نازلينه”.
وأكد ابن شقيق ضحية مستشفى شبرامنت، "نزلنا فعلا في الأسانسير وكل اللي حصل أن خرج من التروللي عجلتين بس ولسه نصه كان جوه الأسانسير، وفي الوقت ده فجأة لقينا الأسانسير اتسحب وحصل عطل، واتزنقت وحاولنا نزقها معرفناش نعمل حاجة وهي نطقت الشهادة قدامنا.
وأضاف "بنتها حاولت تزق لدرجة أن صوابعها باظت وفضلت مزنوقة تلت ساعة، والأسانسير شاط والكهرباء فصلت وفضلنا بالشكل ده لحد ما بتاع الأمن فضل ينزل الأسانسير يدوي لحد ما سلكناه بالعافية، وخرجناها.
واستكمل نجل شقيق ضحية مستشفى شبرامنت، الوضع كان صعب وأنا مكنتش عارف أعمل أي حاجة، واللي حصل أن جسمها اتزنق في الأسانسير، وبقت راسها بره وجسمها جوه، ونطقت الشهادة وماتت وكنا عارفين، ولما نزلناها من الأسانسير قالولنا إحنا بنحاول نعملها إسعافات لكن كانت خلاص ماتت.
وتابع محمد: أنا عايز حقها من إدارة المستشفى أنا شوفتها وهي بتموت ومش عارف أسعفها ولا أعمل حاجة، عايز حقها من اللي حصل فيها اتزنقت لدرجة أن التروللي اللي كانت محطوطة عليه اتقسم نصين ما بالك هي حصل فيها الإهمال بتاعهم هو السبب في حاجة زي دي.
أكدت تحريات أجهزة أمن الجيزة على أن الواقعة لم يكن فيها شبهة جنائية، وأن النيابة ستقوم بتشكيل لجنة لاستكمال التحقيقات ومعاينة الأسانسير في المستشفى والاستماع لأقوال فني الصيانة ومدير المستشفى.
وفحصت الأجهزة الأمنية بمديرية أمن الجيزة، برئاسة اللواء محمد الشرقاوي مدير الإدارة العامة لمباحث الجيزة، البلاغ للوقوف على ملابسات وأسباب الحادث حيث يجرى الاستماع لأقوال مدير مستشفى شبرامنت المركزي بالإضافة لأقوال فني صيانة المصاعد.
تلقت الأجهزة الأمنية بمديرية أمن الجيزة إخطارا من غرفة عمليات النجدة تضمن ورود بلاغ أفاد بوقوع حادث في مصعد داخل مستشفى شبرامنت المركزي وعلى الفور انتقل فريق من المباحث بإشراف اللواء هاني شعراوي مدير المباحث الجنائية إلى موقع البلاغ للوقوف على ملابسات الحادث.
وانتقلت فرق المباحث في الجيزة إلى مستشفى شبرامنت المركزي، حيث أجريت التحريات اللازمة برئاسة العميد محمد مختار رئيس مباحث قطاع جنوب الجيزة، وتحرر المحضر الإداري اللازم عن الواقعة وجرى استكمال التحريات والعرض على النيابة العامة في جنوب الجيزة.
ونعى محافظ الجيزة المهندس عادل النجار، إحدى النزيلات بمستشفى شبرامنت المركزي، السيدة نجاح إسماعيل والتي لفظت أنفاسها الأخيرة جراء تعرضها لحادث في مصعد المستشفى.
ووجه محافظ الجيزة مدير مديرية الصحة بالتنسيق مع رئيس مركز ومدينة أبو النمرس والجهات الأمنية بسرعة التوجه لموقع الحادث وإجراء تحقيق عاجل في الواقعة للوقوف علي اوجه القصور وتكليف شركة الصيانة المتعاقد معها بالمستشفي بالتأكد من سلامة المصاعد الخاصة بالمستشفى قبل عودتها للعمل لضمان سلامة النزلاء والمترددين عليها.
وشدد المحافظ على رؤساء الأحياء والمراكز بالتعاون مع مديري الإدارات الصحية كل في نطاقه بالمرور الدوري علي المستشفيات والوقوف علي انتظام أعمال الصيانة الدورية لكافة المرافق بها وسرعة اصلاح أي أعطال حفاظا على السلامة العامة.
