يحل الفنان محمد على رزق غدا الخميس، ضيفا على الإعلامية فاطمة مصطفى فى حلقة جديدة من حلقات برنامجها الشهير “الراديو بيضحك” على إذاعة 9090.

ويتحدث على رزق خلال الحلقة عن كثير من الأسرار والتفاصيل حول حياته العملية والشخصية بالإضافة إلى الحديث عن صديق عمره تامر ضيائى والذى توفى نتيجة مشاجرة فى أحد المستشفيات بالتجمع الخامس.

محمد على رزق يتحدث عن تامر ضيائى

كشف الفنان محمدعلى رزق بحكم صداقته القوية بالفنان الراحل تامر ضيائى تفاصيل جديدة حول واقعة وفاته.

وكتب على رزق على صفحته الرسمية بموقع الصور الشهير انستجرام: شهادة لوجه الله…أنا أعرف تامر ضيائي من ٢٠٠٤ من أيام فرقة عين الشمس…و دخلنا مركز الإبداع سوى في ٢٠٠٦ و فضلنا صحاب لغاية ما ربنا إسترد أمانته

وتابع: تامر ضيائي طول عمره إنسان محترم و على مدار ٢٠ سنة عمري ماشوفت تامر متعصب أو شخص متجاوز…إللي حصل مع تامر يوم وفاته شئ مهين خلاه ينفجر.

وأضاف: تامر بقاله ١٧ سنة بيراعي زوجته في مرضها عمرنا ماسمعنا عنه إنه عمل مشكلة و كان صابر و راضي بقضاء ربنا.

وتابع : تامر لم يتجاوز الدور زي ماقالوا…بشهادة سوزان زوجتة إنهم كانوا واخدين رقم ٤٢١ و لما جيه الرقم إللي قبلهم بدأوا يقربوا من الباب و لما وصل كان رقمه جيه الأمن منعه و قاله فيه ناس هتدخل الأول فتامر رفض إن حد يتجاوز دوره و من هنا بدأت المشكلة

وتابع: تامر إنفجر علشان مراته التعبانه إللي قاعدة مستنية دورها علشان تاخد الجلسة فيلاقي الأمن بياخد فلوس علشان يدخل ناس قبل دورها

واختتم كلامه قائلا: تامر ماعملش حاجه غير إنه إتمسك بحقه و لما لاقى الراجل بيتعامل معاه بشكل مهين إنفجر، حسبي الله و نعم الوكيل، ربنا يرحمك يا تامر و يجعلك من أهل الجنة