شارك الناقد الرياضي خالد طلعت منشوراً مثيرا عبر صفحته على موقع التواصل الاجتماعي فيسبوك.

وكتب خالد طلعت:"للأسف الشديد متعلمناش من درس المرحوم أحمد رفعت رغم إنه مفاتش عليه أيام قليلة ورجعنا تاني لطبيعتنا ولمساوئنا ولأخطائنا.. لما رفعت توفى معظم الصفحات والجماهير والاعلام قالوا انهم مش هيسخروا ولا يتريقوا على حد تاني عشان منسببلوش أذى نفسي

لكن للأسف الشديد الناس نسيت خلاص بعد أيام قليلة ومن امبارح فيه حالة من التنمر والتريقة على ناصر منسي مهاجم الزمالك لمجرد أنه اضاع فرصة لتسجيل هدف رغم ان اعظم لاعبي العالم بيضيعوا فرص وبتحصل عادي جدا

أكيد ناصر متضايق جدا انه ضيع الفرصة دي واكيد المدرب عنفه بعد الماتش وغالبا هيمشي من الزمالك اخر الموسم والفرصة دي أكدت على رحيله ، يعني الراجل أصلا مش ناقص كمان الحملة اللي معمولة عليه

النهاردة يوم عاشوراء ويوم صيام وتقرب من ربنا يا ريت نفتكر رفعت واللي حصله ويا ريت نتعلم الدرس ومننساش بسرعة قوي كده".