علق الإعلامي عمرو الدردير على أزمة الراحل أحمد رفعت عبر حسابه بموقع فيسبوك.

وكتب الدردير: بقالي كام يوم بفكر في حوار أحمد رفعت رحمه الله عليه بس ممكن من ناحيه خاصه شويه اللي هو هل ممكن الانسان قلبه ينكسر فعلا ويتأذي نفسيا للدرجه اللي يوصل بيها انه ممكن يتوفاه الله رجعت من ناحيه تانيه اسال نفسي طيب هو ليه النبي صلي الله عليه وسلم استعاذ من غلبة الدين (وقهر الرجال).

و تابع : في الاول وفي الاخر دي كوره وكلنا هنموت بس لازم نفكر تاني ونعيد الحسبه مره تانيه هو ايه هيحصل بعد ما أموت طيب أنا غلطت في حياتي في حاجات كتير هروح اقول ايه لربنا لما يسألني ياتري هكذب زي ما كل يوم بنكذب بدل المره الواحده مليون مره والا هقول الصدق

و أضاف : وأرجع اسأل سؤال هو الناس اللي بتعمل كده وبيكسروا قلوب العباد بيناموا وبيعيشوا حياتهم عادي كده بيبقوا فعلا مرتاحين ما بيبقوش فعلا عندهم احساس الكسره والاذي اللي سببوه لغيرهم لمجرد منفعه او غرض شخصي عاوزين يحققوه في نفوسهم .

و اختتم : مش بلاقي قدامي إلا نفس الاجابة في كل مره (وعند الله تجتمع الخصوم)