هاجمت الإعلامية مروة صبري، الفنانة سمية الخشاب بسبب رأيها فى الثانوية العامة ونصيحتي للطلاب، وذلك خلال برنامجها قعدة ستات.

وقالت مروة صبرى : الناس في الثانوية العامة بتبقى محتاجة تشجيع ودعم اتفاجئنا بالفنانة المحترمة سمية الخشاب في عز الخوف والرعب، والطلاب قاعدين بيذاكروا والأهالي بتدفع دم قلبها على الدروس ومرعوبين على أولادهم، ونفسهم يجيبوا أعلى المجاميع، بتقولهم ولا تعليم ولا شهادة ولا نيلة اللي معاه فلوس هو اللي هيقدر يصرف على نفسه والشهادة هتعلمها قرطاس طعمية".

وأضافت مروة صبرى: أنا قلت الصفحة بتاعتها اتسرقت أكيد مفيش فنانة مصرية اسمها معروف وعملت بطولات تطلع تقول نصيحة زي دي للطلاب".

وأوضحت مروة صبرى : أي حد مشهور في المجتمع إحنا بنبقى واخدينه قدوة وبنبقى شايفين إنه بيتكلم صح في ناس بتحبه وبتسمعه، إذا بكلمة منك ممكن تدعمي بتوع ثانوية عامة وأهاليهم وبكلمة منك ممكن تحبطي بعض الناس ولكن اعتقد أن مفيش حد ممكن يأثر فيه التصريح اللي إنتي كاتباه لأن دا تصريح ميطلعش من فنانة ولا يطلع من إنسان عايش على وجه الأرض طبيعي".

وأشارت مروة صبرى: إنك تقولي للعيال الغلابة اللي قاعدين بيذاكروا ونفسهم ينجحوا ويعملوا أحسن حاجة والأبهات اللي فلوسهم يا عيني رايحة على الدروس الخصوصية وعايز ابنه أو بنته يبقوا أحسن الناس ويحققوا أحسن النتايج ويدخلوا أحسن الكليات وتطلعي تقوليلي في الآخر هتعملها قرطاس طعمية ولا قرطاس لب دا كلام، للأسف إني اتأكد أن الصفحة بتاعة سمية الخشاب متسرقتش وأن البوست دا هي اللي كاتباه دي من الحاجات الغريبة جدا".

وأنهت مروة صبرى كلامها: متسمعوش كلام سمية الخشاب الشهادة مهمة وبتحدد مصير".

وكانت سمية الخشاب وجهت نصائح لطلاق الثانوية العامة كتبتها عبر حسابها على موقع التواصل الاجتماعي اكس قائلة : "التعليم مبيحددش لا مصير ولا نيله، بتعرف تجيب فلوس هتعرف تتجوز وتسافر مبتعرفش يبقي الشهادة هتقرطسها وتحط فيها طعمية".