EN
أكدت الفنانة المحجبة منال عبد اللطيف ان فكرة خلع الحجاب تراودها ، وذلك فى حوار تليفزيوني مع الإعلامية مروة صبري .
وقالت منال عبد اللطيف : فكرت أني أقلع الحجاب، ليه الفكرة بتراودني لأن أوقات بتوحشني منال المنطلقة، وأنا بطبيعتي منطلقة وأوقات بتوحشني منال وابقى عايزة انطلق في كل حاجة وأن مفيش حاجة تقيدني لكن سريعًا بقول لأ أنتي تدعي ربنا انه يثبتك لأن دي خطوة مش هينة على طول برجع لدماغي فورًا لكن بتراودني الفكرة طبعًا بتراودني».
وأضافت منال عبد اللطيف : وكل ما بتيجي الفكرة على بالي وأول يا منال اقلعي بقى الحجاب وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا أن إن شاء الله لما بنتي الكبيرة فرح تتجوز بفكر أني في الفرح أقلع الحجاب مش عارفة ليه بس الفكرة دي بتزن عليا ومش ضروري ألبس فستان مفتوح أهم حاجة أني أكون منطلقة لأن دايمًا الطرحة بتضايقني وأقعد طول الوقت أظبطها، وبقالي 11 سنة محجبة .
منال عبد اللطيف والحجاب:
ونفت الفنانة منال عبداللطيف تمامًا، كون إنها ارتدت الحجاب بسبب تساقط شعرها، مؤكدة أن السبب وراء ذلك هو مرورها بقصة مأساوية على حد تعبيرها في إحدى اللقاءات التليفزيونية، موضحة: “عشت قصة مأساوية، لأن كان في واحدة فضلت تكلمني على الماسنجر وتقولي أنت اتحجبتي ليه، قولتلها الحمد لله، قالتلي لا أنتي اتحجبتي علشان انتي قرعة”.
وتابعت: “الست دي قالت لي أنا عرفت أنك كنتي بتصبغي شعرك ووقع وبقيتي قرعة علشان كده اتحجبتي، على الرغم من أن عمري ما عملت صبغة في شعري”.
وروت الفنانة منال عبداللطيف قصة ارتدائها الحجاب، موضحة: “قرار الحجاب مكنش مفاجئ وقعدت سنتين محتارة ومترددة في إني آخد القرار لحد ما جاتلي رؤية في المنام فيما معناها تزودوا فإن خير الزاد التقوى، وقلت توكلت على الله وأخبرت زوجي بقرار الحجاب وفي الأول مكنش مصدقني، لأن شخصية مزاجه شوية، ولكني أكدت له إني اتحجبت وقولتله يشتريلي ملابس جديدة مناسبة للحجاب، ولو عايزة اقلع الحجاب هقلعه لكن مش هتحايل على قراري مع ربنا وأمثل وانا لابسة باروكة”.
ومنال عبداللطيف، هي ممثلة بدأت مسيرتها منذ الطفولة في برامج الأطفال منها “البرلمان الصغير”، فكان أول من اكتشفها المخرج محمود ابراهيم، الذي قدمها للعمل في مسلسل الأطفال بندق وبندقة.
وشاركت الفنانة منال عبداللطيف في العديد من المسلسلات الدرامية منها “ضمير أبلة حكمت، فوازير جدو عبده، أرابيسك، السيرة الهلالية، رياح الماضي، الأبطال”، إلى جانب مشاركتها في مسرحية “أنا لايص وأخويا هايص”، وظلت مستمرة في عملها الفني حتى ارتدت الحجاب عام 2012 واعتزلت الفن.
