زهرة رامي تسلط الضوء على «جواب» مودي الإمام للفنان حسين الإمام

سلطت زهرة رامي، في برنامجها “حكايات جوابات”، في موسمه الثاني، والذي تقدمه على راديو “إنرجي 92.1”، رسالة خاصة أرسلها الموسيقار مودي الإمام إلى الفنان الراحل حسين الإمام.

وقالت زهرة، في بداية حديثها، إن الرسالة نشرها مودي الإمام عبر حسابه الرسمي على “فيس بوك”، في مايو 2016، في الذكرى الثانية لرحيل حسين الإمام. 

وجاء نص الرسالة التي قدمتها زهرة رامي: "تصدق؟ أنا لسه باحس وأنا باعدي الشارع، إنك هاتاخدني من إيدي عشان أبقى في أمان وماتوهش! لسه عاوز أحكي لك أنا قد إيه بقيت سباح ماهر، وعن الشجرة العالية إللي تسلقتها، وعن آخر حيلة علمتها لروي كلبنا".

وتابعت رامي قراءتها للرسالة وقالت: “لسه حاسس إني محتاج أوريك قد إيه أنا عازف ماهر على الدرامز والبيانو، والجيتار، ورسام ممتاز، زي ما علمتني، لسه مستني تزورني، عشان تعلمني چودو ومصارعة روماني، ونغني سوا، ونضحك لما عينينا تدمع، زي ما اتعودنا، ولسه عاوز أطبخ لاتنين، عشان لو اتصلت وزرتني ناكل سوا وندردش، ونعزف ونغني، ولسه مستني رنة تليفونك وسؤالك عن صحتي، وأحوالي بإلحاح، زي عوايدك”.

وأضاف مودي الإمام في رسالته لحسين: "لسه حاسس إنك هتزعق، وتخلي بلطجية حوش المدرسة يجروا من قدامك زي الفراخ وأنا واقف جنبك، قصير، وفخور.. مزقطط. ولسه عاوز أثبت لك قد إيه أنا بقيت قوي، وماهر، وفاهم، وشجاع، أنا لسه باتجاهل مكالمات صحافيين النميمة الساقطين، وغلظة قلوبهم، وأكلهم للنار من فلوس حرام جت من نبأ الفاسق وحديث الإفك والفتنة، وأكلهم للحم البشر، زي ما نصحتني تمام، وأحب أطمنك، إني لسه بانظف بيتي بنفسي، وأغسل وأكوى ملابس، وأعالج جسمي، وأعمل تمارين، وباتمرن وعزفي وصوتي أحسن من كل وقت فات من بعد ما بطلت التدخين بسنين".