EN
"أنا بجد تعبت ده مش إنسان.. نفسي أخلص منه أنا مش عارفة أعمل إيه"، بهذه الكلمات بدأت السيدة الثلاثينية "ر. م. ع"، ابنة محافظة سوهاج، حديثها مع موقع “صدى البلد”، موضحة أنها أصبحت مريضة بعدة أمراض مُزمنة كـ الضغط والسكر؛ بسبب زوجها الذي تزوج عليها من صديقته منذ أيام الجامعة، بعد 8 أشهر من زواجهما.
"اتجوزنا في 11 فبراير 2022م، وكنا كويسين ومفيش بينا أي مشاكل ولا حاجة، اتفاجئت من كام شهر بأنه اتغير معايا جدا وبقى أسلوبه سيئ وكاره نفسه ومبيحبش قعدة البيت وبقى يبات برا، وكل ما أسأله يقولي كنت نايم عند ماما.. في مرة بتصل بحماتي اللي هي خالتي أساسًا وبقولها هو مصطفى هيبات عندك زي كل يوم مش تعقليه يا حبيبتي".
واستكملت حديثها قائلة: "فوجئت بردها عليا: مصطفى؟ هو مش عندك؟ وبعدين بيبات عندي كل يوم إزاي يعني أنا ابني ليا شهر لا شوفته ولا سمعت حتى صوته وكنت لما أشوفك هموتك بسببه.. قعدت أنا وهي نتكلم ساعة ونحكي لبعض عن أفعاله الفترة دي، وقالت بلاش تكلميه في حاجة، بس أنا مقدرتش واول ما شوفت وشه سألته وواجهته وصدمني برده عليا".
الرد الصادم
كان رد الزوج الذي اقترب عمره من الأربعين عامًا، صادمًا لزوجته، ووقع على مسمعها كالصاعقة، وجعل دموعها تنهمر على خديها، وقلبها يدق بسرعة قطار التالجو، وصوت صُراخها كاد أن يُزلزل الأرض زلزالًا، "بصي من الآخر أنا اتجوزتك عشان أكسب رضا أمي وعشان خالتي الله يرحمها كمان، وعمري ما شوفتك مراتي أصلًا بس كنتي نصيبي ورضيت بيه".
واستكمل رده عليها بقسوة وغرور: "أنا اتحملتك 8 شهور بالعافية، بس خلاص اتجوزت حبيبتي من أيام الجامعة اللي يشاء القدر إنها تطلق بعد جوازنا مفيش كام شهر، وصدقيني لو كان ده حصل قبل ما أتجوزك مكنتيش دخلتي ذمتي أساسًا لأنها حب عمري بجد ومش مصدق إنها بقيت من نصيبي.. أنا مقدر إنك رفضتي عرسان الدنيا عشان بتحبيني، ويمكن ده الشيء اللي خلاني مسيبكيش لدلوقتي، بس القرار دلوقتي قرارك، يا تكملي على كده يا كل واحد يروح لحاله، والحمد لله إن ربنا لسه ما أرادش يحصل حمل".
وأشارت الزوجة الثلاثينية إلى أن زوجها ذهب بزوجته للعيش في مسكن زوجيتها، ولم تستطع السيطرة عليه نهائيًا ولم يراعِ شعورها، "روحت رافعة دعوى طلاق، بس بعد ما رفعتها عرفت إني هخسر كل حقوقي ومش عارفه أعمل إيه".
