EN
ناشدت ياسمين عز أصحاب المطاعم إضافة طبق حلويات باسم الفرعون الكبير والصغير، مشيرة إلي أنها متبرعة بحقوق الملكية لمصنع السكر للراجل.
وأضافت ياسمين عز خلال تقديمها حلقة اليوم من برنامج "كلام الناس": صحيت الصبح كان قلبي موجوع وقولت أول ما أطلع من البرنامج هعمل مناشدة لكل الفراعين أصحاب المطاعم، اخدتي بالك إن أول ما جوزك يدخل المطعم ويفتح المنيو بيكون حاسس بحزن وألم عمرك سألتيه مالك يا فرعون لا انتي بتفكري في طبق الفتة اللي هتشفطيه وخلاص.
وأضافت ياسمين عز: صاحب المطعم اللي جايلك عريس وافقي عليه عشان بيوفرلك الغدا كل يوم مفيش هناكل ايه النهاردة، اتجوزي صاحب مطعم لو اتقدملك، وحطيه تاج فوق راسك.
وتطرقت بحديثها لموضوع آخر وهو لماذا يطلب الرجل يد المرأة وليس شيء آخر، فقالت: ليه الراجل لما بيتجوز الست بيطلب ايديها مش ودانها أو مناخيرها؟.. السبب الأول إن الإيد هي اللي بتطبخ يعني لازم تتعلمي تتطبخي وتتفلسفي في الطبخ، والحاجة الوحيدة اللي هيلبسك فيها خاتم هي ايديك، وأخيرا بيكون فاقد حنان وانتي اللي هتعوضيه عن الحنان ده والإيد هي الحاجة الوحيدة اللي بتطبطب.
وتابعت: لماذا نطبطب على كتف الرجل؟ شوفي التاريخ قالك ايه الراجل لو عيط محدش يجي جنبه لو بكى هيسكت لوحده لو حزن هيقولوا هو يفك لوحده، هو هيفك لوحده ازاي هنحطه في الميكرويف وانتي لو قولتي واء هيحننوكي ويطبطبوا عليكي هو مالهوش صاحب ولا أهل، طبطبي بايدك على كتاف جوزك بدل ما تيجي واحدة تطبقه وتاخده وتمشي.
واستكملت: حافظي على جوزك أنتي فتى أحلامك كان كابتن ماجد وربنا كرمك بفرعون حطيه على راسك وامشي، ومترزعيش باب عربية جوزك أي كان نوعها، واتعاملي معاه زي ما بتتعاملي مع باب تلاجتك متفتيش عربية جوزك ومتعوجيش المراية عشان تعدلي طرحتك، ومتستغليس أن جوزك نزل من العربية وبخفة يد تسحبي الموبايل وتقلبي فيه وتكتشفي السر الدفين وتعملي فيلم أنا والخائن بلاش الفيلم ده في العربية وشكلك وشكلنا بقى وحش وترجعي تقولي مش بيوصلنا ما هو من عمايلك.
