EN
احتلت الفنانة سهير رمزي التريند عبر مواقع التواصل الاجتماعي، ومحرك البحث جوجل، بعد تصريحاتها المثيرة للجدل عن حياتها الشخصية ومشوارها الفني، خلال لقائها في أحد البرامج التليفزيونية، حيث تحدثت عن مشاهدها الجريئة في أفلامها وسبب طلاقها، وغيرها من التصريحات.
10 تصريحات لـ سهير رمزي اشعلت السوشيال ميديا
فيلم المذنبون سبب طلاقي
قالت الفنانة سهير رمزي خلال لقائها في برنامج «حبر سري»، أن فيلم «المذنبون» هو السبب في طلاقها، موضحة: « انا عنيدة بطبعي وجوزي رفض تمثيلي للفيلم واشترط عليا لو وافقت هنطلق وننفصل وبالفعل اتطلقنا، ورجعنا بعد كده، وقصة المذنبون كانت في بداياتي الفنية ومن كتابة نجيب محفوظ».
وتابعت: « جريت على الفيلم ووافقت وعملت الفيلم وكنت فرحانه بيه جدًا، وهو من علامات السينما ومقدرش أقول عليه حاجة ولكن كنت جريئة في مشاهد فيه».
لم أتزوج حلمي بكر لدخول الفن
نفت الفنانة سهير رمزي تمامًا ما تردد من شائعات حول زواجها من الموسيقار الكبير حلمي بكر لدخول مجال الفن، موضحة « جوازي من حلمي بكر كان قبل السينما وكنت صغيرة جدًا وقتها، لكن في دماغي طول عمري السينما، ولكن الفترة دي كنت في مدرسة ومفيش في دماغي حته السينما، وهو كمان كان في بداياته ومكنش موسيقار كبير وكان رافض التمثيل».
لم أتأثر بانفصال والدي عن والدتي
أشارت الفنانة سهير رمزي في لقائها التليفزيوني إلى أن انفصال والدها ووالدتها عن بعضهما البعض لم يؤثر فيها ولم يسبب لها عقدة في حياتها جعلها تلجأ إلى طبيب نفسي، إلا أنها تأثرت كثيرًا برحيل والدتها عن الحياة، قائلة: « محزنتش في حياتي غير على أمي ومفيش حاجة كانت تهزني قد أمي، ولما رحلت اتكسرت واتوجعت ولكن موصلتش للاكتئاب، وأنا مؤمنة وعارفة أن الموت مصير لكن البعد والفراق صعب».
ندمانة على عدم الإنجاب وفكرت في التبني
عبرت الفنانة سهير رمزي عن شعورها بالندم الشديد لعدم إنجابها، قائلة: « أنا وصلت لمرحلة أمي في السن، وزعلانه أني عملت في نفسي كده، وأني مجبتش انسان يقف جنبي وعلشان كده بحب الجيل الجديد اللي طالع وبشوف حياته وبيتجوز ويخلف وجيلنا كلنا كنا بنخاف علشان النجومية والشهرة».
وتابعت: « لو كنت جبت طفل وانا شغالة مكنتش هخرج بره البيت، وكنت انانية لاني حبيت نفسي اكثر من أني أكون عندي طفل، وفكرت في التبني ولكن مش يعيش معايا لأنها مسئولية».
حقيقة زواج سهير رمزي من عمر الشريف
نفت الفنانة سهير رمزي تمامًا ما تم تداوله عن زواجها من النجم الراحل عمر الشريف قائلة: « جوازي من عمر الشريف إشاعة وهو من صغري كان فتى أحلامي، وفتى أحلام بنات كتير من جيلي، واتكتب كتير وقتها إننا اتجوزنا ولكن هو كان صديق».
وتابعت: « انا كنت من معجبي عمر الشريف ورحبت به خلال زيارة لمنزلي هو وضيوفه وعملت حفلة في البيت واستقبلته وانتشرت الشائعات بعدها».
حقيقة منع سوزان مبارك عرض مسلسلها الرمضاني
قالت الفنانة سهير رمزي عن ما تردد عن منع السيدة سوزان مبارك عرض مسلسل «حبيب الروح» في التليفزيون المصري: « أنا سمعت ده، وكان المسلسل هيتعرض على القناة الأولى وكنت متفقة على كده، وفوجئت بعدم عرض المسلسل في أول يوم رمضان، وسألت المنتج المسلسل منزلش ليه قالي جت لنا أوامر منزعش المسلسل».
وأضافت: «رد عليا إن المسلسل بيعمل انتشار للحجاب، وإنتي لابسه الحجاب، والحجاب حلو، وفي ناس هتقلدك وتمشي وراكي، ولكن معرفش ده حقيقة ولا لأ، واتوقف المسلسل ولم يُذاع على القناة الأولى».
قلبي ورطني في قرارات كثيرة خاطئة
اختارت الفنانة سهير رمزي في فترة من فترات حياتها، أغلب قراراتها بقلبها وعقلها، ثم بعد ذلك أصبحت تفكر بقلبها فقط، موضحة: « كنت سايبة نفسي لقلبي فقط ومش عايزة عقلي يشتغل وقلبي ورطني كتير واندفعت وتسرعت كتير وتراجعت بعد كده».
وتابعت: « مش بحب الندم واللي جاي هيكون أحسن أكيد وانا بطبيعتي خوافة وبخاف من حاجات كتير».
كنت مقتنعة بأدواري الجريئة وأعمالي تاريخ ملزمه به
أكدت الفنانة سهير رمزي خلال لقائها في برنامج «حبر سري»، على اقتناعها الكامل بأدوارها الجريئة في وقتها، قائلة: « لو رجع بين الزمن واتعرض عليا مشاهد جريئة لو دلوقتي هرفضها، لكن زمان كنت بعملها وانا مقتنعه بيها ومكنش في جرءة زي دلوقتي».
وتابعت: « المشاهد الجريئة اللي كنت بعملها كانت في حدوته الفيلم وفي سياق الموضوع، وده اللي كان كله بيعمله ومكنتش بعمل حاجة شاذة، ولو عندي القدرة أمسح أعمالي من على السوشيال ميديا واليوتيوب مش هعمل كده وده تاريخ وانا عملته وملزمة بيه».
بزعل لما بشوف الحجاب اللي كنت بلبسه
أكدت الفنانة سهير رمزي أن بدايتها للعمل الفني كانت من خلال موهبتها الفنية ثم جمالها، ثم عادت لتقديم أدوار كانت تعتمد كليًا على موهبتها، موضحه: « بزعل من نفسي دلوقتي لما بشوف الحجاب اللي كنت بعمله وكان طرح كتير وألوان كتير، لكن مش بزعل من النقد»
كنت هسمم أمي
تحدثت الفنانة سهير رمزي عن احد المواقف الصعبة التي تعرضت لها، قائلة: « انا بحب أمي بجنون وفي يوم تعبت وقالت لي عندي مغص وتعبانة، وانا كان عندي دواء بيريح المعدة، لما هي بتتعب أنا أعصابي بتبوظ، دخلت جبت إزازة وشربتها، وبعدين رجعت لقيت إزازة الدواء اللي كنت هديهولها، وطلع أني اديتها من إزازة زيت مادة سامة، كان بينضف من جوا».
وتابعت: « اترعبت وطلبت من حد بيساعدني في البيت ينزل الصيدلية ويسأل، وفعلا كان لازم أمي تاخد شربة ملح علشان ألحقها، روحت وطلبت منها تاخد شربة ملح، سألتني ليه دا الدواء مريحني، ولما عرفت قالت انتي هتموتي أمك بالألوان ولا الأبيض والأسود دا زيت تنضيف التليفزيون».
