نشر محمد عبد الخالق، معلم دراسات اجتماعية، على صفحته على موقع التواصل الاجتماعي “فيس بوك”، صورة لوحة رسمها تلميذ بـ الصف الخامس الابتدائي ليعبر عن معاناته مع الدراسة هذا العام.

ورسم التلميذ الذي ما زال يدرس في الصف الخامس الابتدائي، صورة المنهج متجسدا في شكل وحش أو عفريت ينهش التلميذ الذي يبكي وتسقط مع دموعه كل ما يتعلق بالرفاهية والفرح والأعياد وغيرها من الأشياء التي خسرها التلميذ من وجهة نظره بسبب "عفريت المنهج الذي قتله"، ثم رسم التلميذ في نهاية لوحته المعبرة عن حالته؛ صورة مربع كتب عليه “القبر”، ليؤكد أن وحش أو عفريت منهج 5 ابتدائي سيجعل التلميذ يموت في النهاية.

وقال المعلم الذي نشر الصورة: “مامته لسه باعتة لي الصورة حالا.. لا تعليق”.

من جانبها، قالت مروة سمير، والدة تلميذ الصف الخامس الابتدائي الذي رسم هذه الصورة: “دى رسمة ابني فعلا، أنا قلبي وجعني لما رسمها وحسيت أد إيه هما مضغوطين”.

وقد لاقت هذه الصورة تفاعلا كبيرا من جانب أولياء الأمور المتابعين، حيث قالت رشا بكري: “صح أنا كمان بنتي قالت كان يوم أسود لما دخلت رابعة، وأعدت تعيط”.

وقالت أميرة جمال: "بنتى من أسبوعين دخلت أصحيها للمدرسة لقيتها معلقة ورقة جنب سريرها مكتوب عليها "حياة بدون أمل"، عشان تعبت من ضغط المذاكرة ومش عارفة ترتاح وفقدت
الأمل إنها ترتاح".

وقالت هبة حازم: “أنا بناتى بيقولوا ما كفاية تعليم لحد كده، إحنا تعبنا وزهقنا، ومش عايزين أى كلام عن المذاكرة ولا عن الامتحانات”.

وقالت ماريان عاطف: “ده جيل تعب من قبل ما يبدأ، وذنبهم في رقبة كل واحد كان يقدر يغير حاجة ومغيرش”.

وقالت جنة عماد: “أنا للأسف بنتي سنة خامسة طلع فى شعرها ثعلبة والدكتورة قالتلي حالة نفسية، العيل معندوش وقت يلعب ويستمتع بيومه زى ما كنا فى طفولتنا بنلعب ونفرح ونزور قرايبنا”.

وقالت نورا محمد: “ابني بجد علاقتي به بقت كلها زعيق ومشاكل بسبب ضغط المذاكرة، وطول الوقت في ضغط نفسي”.

وقالت آية سيد: “بنتي مضغوطة، امتحان ورا امتحان والمنهج مش عايز يخلص”.

وقالت هبة خطاب: “ابني في رابعة ابتدائي وبيقولي دا أنا لو رابعة ثانوي مش هابقى كدا والكتب تبقى كتير كدا”.

وقالت فاطمة أبو بكر: “ده اسمه تدمير مش تعليم، لما كنا فى سنهم كان كل اللى بنعمله نيجى نكتب الواجب وننزل نجرى نلعب دلوقتي مش بيشوفوا النوم يا قلبي”.