EN
أثارت البلوجر نورهان قنديل جدلا واسعا على مواقع التواصل الأجتماعي خلال الساعات الماضية، وذلك بعدما أعلنت عن خلع الحجاب، وذلك عبر حسابها الرسمي على موقع التواصل الأجتماعي الأنستجرام.
كتبت نورهان قنديل عبر حسابها على إنستجرام:"مش عارفة ليه كل ده حصلى… بس أنا فى ابتلاء شديد و معنديش تفسير ولا تبرير بس انا كنت بمر بمرحلة حزن و ضعف شديدة من قبل لبسى للحجاب و قلبى و كل حاجة فية كانت بتحركنى ناحية الخطوة دى علشان ابقى اقوى لنفسى و لبناتى و شغلى و ربنا وحده بس هو اللى عالم ضميرى و نيتى …بس النتيجة انى بقيت اضعف بكتير و الخطوة دى بقت محتاجة منى قوة مش عندى."
تابعت نورهان قنديل :"انا اكيد حزينة انى مقدرتش اكمل فى حاجة بحلم بيها من سنين و بدعى ربنا كل يوم انه يختم حياتى بيها و بدعى ربنا من قلبى يحببنى فى نفسى فى الحجاب الصحيح اللى مقدرتش أعمله، وحزينة أكتر أنى بعلن ضعفى و تشوشى و اضطرابى اللى غلبنى و سيطر عليه و مش عارفة موصلنى لفين…..و اسفة طبعا طبعا اسفة انى دخلتكوا معايا فى متاهة قرار شخصى بس هو لانه حاجة الواحد لازم يكون فخور بانه يعلنها.. الحجاب ملهوش اى دعوة بأى توتر انا بعيشه.
بالعكس انا عارفة انى اجمل بكتير و انا لابساه…بس فى فرق كبير بين انى اتخلى عنه و بين انى مش عارفة البسه بالشكل اللى يخلينى قوية و واثقة و قد المسئولية…او ده التفكير اللى للأسف بقى مسيطر عليه و اتخلل لقلبى.
قالت:"مش هحمل الناس طبعا مسئولية حاجة…بس انا حاسة انى بمر بأزمة كبيرة و اكيد كل حاجة خير و ده يقينى بربنا….بس اللى اتكشفلى فى الفترة البسيطة دى كان اكتر من تحملى و لأول مرة اركز فى حجم القسوة اللى فى القلوب….مش عارفة ليه بس اظن لعنة السوشيال ميديا اصابت قلبى و بقيت حاسة انه مش قادرة على كمية الصراعات اللى بعيشها بسببها و لا مبسوطة بأنى شخصية عامة."
أضافت:" انا هعتبر كل اللى هيحصل من هجوم طبعا ده فى ميزان حسناتى لانى اكيد محتاجة ده، بس يا جماعة و ربنا وحده فقط يعلم، انا لا و لن اسعى فى يوم لإرضاء احد، اكيد سعيت بكل حب و قلب انى اسيب بصمة و نفع و اثر طيب لبناتى و لكل اللى بيحبنى و ربنا وفقنى و اكرمنى جدا…ربنا وحده عالم انا بعيش ايه و هو و بس اللى يهمنى…و بعده امى و جوزى و بناتى و شغلى اللى تعبت فيه جدا…على فكرة انا اجتماعيا و شخصيا فشلت كتير يمكن ده اول فشل يكون معلن بالتفاصيل لكن قولتلكم كتير انا وقعت و قمت و هفضل اعافر بس بتعلم…و اظن اخدت درس يسمحلى اقول ان اى حد هيتدخل فى حياتى الشخصية او قراراتى انا هعرضه لمسائلة قانونية لأنى مش معنى انى شخصية عامة يبقى انا مستباحة…انا ام و زوجة و شخص بيصارع ضغوط الحياة كل يوم ذى اى حد.
أنا متقبلة الهجوم أو إلغاء المتابعات بصدر رحب جدااا بس الاحترام مش اختيار."
اختتمت حديثها:"عندى يقين إن ربنا هيلهمنى الصواب و مش هيسبنى و هيقوينى و يسامحنى لأنه أرحم بيه من نفسى."
