EN
“رحاب” زوجة وقفت أمام محكمة الأسرة بالزنانيري في دعوة خلع .. تشتكي زوجها، وقالت: “تركني في مرضي، وجرى وراء ملذاته وشهواته المخدر والشابو"، ما دعاها للانفصال عنه.
وأضافت الزوجة أمام محكمة الأسرة في القضية: "زوجي متقاش ربنا فيا، سابني وأنا مريضة وفي أشد الحاجة إليه، وجرى وراء ملذاته، وخانني مع سلفتي، لدرجة إني لقيتهم في وضع مخل".
اقرأ أيضا: زوجى يسرق ملابس الجيران الداخلية و"بيعمل بيها حاجات غريبة"
اقرأ أيضا: زوجة أمام محكمة الأسرة: «كان بيحكى لـ أمه على كل حاجة»
تسرد الزوجة المنفصلة تفاصيل الخلافات الزوجية التى دفعتها للانفصال عن زوجها قائلة: “أنا اتجوزت عادل من 8 سنين وخلفت منه 3 أولاد وبنت وعايشين مع أهله، من سنتين عمل عملية، ومن وقتها وهو عاجز عن العمل وأنا اللي بصرف عليه”.
سلفتي بملابس مكشوفة
وتكمل: “حماتي بعد كده جالها كورونا فعزلت نفسي خوفا من الإصابة، جه يوم كنت تعبت من العزل وقلت أطلع أطمن على العيال، لما طلعت لقيته قاعد مع سلفتي بملابس مكشوفة، بعدها القصة دي اتكررت تاني وساعتها اضطريت إني أتكلم مع كل واحد فيهم لوحده وقلتلهم الوضع ده ما ينفعش وحرام أصلا، بعد كده قلت لجوزي إني مقصرة في حقك والعزل واخدني منك، بس مقدرش اشوفك قاعد مع ست غيري”.
وروت الزوجة واقعة سحلها قبل الطلاق على يد زوجها وسلفتها: :في يوم كنت واقفة في السطوح بنشر الغسيل شوفتهم مع بعض دون ملابس، ولما هددتهم إني هفضحهم سحلوني علي السلالم وجتلي كسور في جسمي كله".
اتهمني بالسرقة قدام أبويا وامي
وتضيف: "بعد ما سيبت البيت ورحت عند اهلي جالنا الساعة 3 الفجر واتهمني بالسرقة قدام أبويا وأمي وإخواتي، ادعى إني سرقت من أهله 3 آلاف جنيه، وكان إثباته إنه راح للشيخ اللي في منطقتنا اللي بيكشف أعمال الناس في مراية، وشاف في مرايتي عند الشيخ إني سرقتهم، وطبعا كل ده كدب عشان يعرف يغطي على قصة خيانته ليا ومطلبش منه الطلاق ويضطر يديني حقوقي كاملة، ومن ساعتها وهو واخد عيالي مني وكل أمنيتي إني أطلق منه وأرجع أشوف عيالي تاني".
