EN 
نشرت الناقدة ماجدة خير الله، تعليقا عبر صفحتها على موقع التواصل الاجتماعى فيسبوك بشان ما أثير حول الفنان سعيد صالح بعد تصريحات فكري صادق عنه والتى قال فيها أنه ممثل عادى وأن عادل إمام أشطر منه.
وقالت ماجدة خير الله: “عندي يقين إن الإنسان مسؤول بشكل ما عن حظه، ولما حد بيقعد يشتكي أن الدنيا ملطشة معاه، ومخدش حقه، كن على يقين إنه يستحق هذا القدر من الحظ الذي ناله، فالله ليس ظلاما للعبيد!”.
وأضافت ماجدة خير الله: “ممثل كان محدش حاسس بيه، وكان قاعد في نقطة الظل مستور ومحدش دريان بيه، يقوم يبتسم له الحظ ويتذكره مهرجان الدراما، مع مجموعة من ممثلي الأدوار التانية والثالثة والرابعة، وتقوم مذيعة كبيرة تستضيفه في برنامجها، وتأتيه فرصة العمر أن يظهر للناس ويتذكره البعض فيتحدث عن سوء حظه، وأنه مخدش ما يستحقه ومحدش بيشغله كل ده ماشي”.
وأوضحت ماجدة خير الله: “يقوم تاخده الجلالة ويلبس ثوب الحكمة ويبتدي يقيم الزملاء، اللي نالوا قدرًا من المجد والشهرة نتيجة تميز وندرة موهبتهم وسعيهم وكفاحهم المستمر على مدى السنين!! (هنا سأسكت قليلا)”.
وأشارت خير الله: “واتذكر الأستاذ اللي طلع في برنامج لوائل الابراشي واخذ يصيح ( أنت مين ياولد )، معلقا على كلام فارغ قاله أحدهم! قد يقول قائل من حق أي مواطن يقول رأيه، في أي فنان، هذا حقيقي لكن برضه من حق أي مواطن تاني أن يعلق على هراء المواطن الأولاني، ويقوله أبشر كده الناس كلها فهمت مستوي الـIQ بتاعك ومستوى موهبتك وأخلاقك، ونتأكد إن محدش ظلمك، ولكن محدودية موهبتك وسوء تقديرك، لحجم موهبة الآخرين يضعك في نقطة ظل ربما تكمل فيها القادم من حياتك”.
تعليق ابن فكرى صادق
دافع مراد فكري صادق عن والده بعد تصريحاته الأخيرة عن الفنان الراحل سعيد صالح أنه فنان عادي وهجوم ابنته عليه بسبب هذا التصريح مؤكدا أن فكري صادق وسعيد صالح كانا من أقرب الأصدقاء بعضهما لبعض وأن ما حدث من والده ما هو إلا هو سوء تفاهم وعفوية بسبب تقدمه فى السن.
وكتب مراد على صفحته الشخصية بموقع التواصل الاجتماعي فيس بوك: أختى الغالية و الفنانة بنت الأصول هند سعيد صالح طبعا انتى تعلمى جيدآ عشقى و احترامى و تقديرى للنجم الكبير سعيد صالح و تاريخه منذ صغرى حتى تخرجنا انا وانتى من سنين زملاء واخوات من المعهد العالى للسينما.
وتابع: احنا اكبر من اننا نتكلم على صفحات الفيس بوك يا بنت عمى و عمنا كلنا، ووالدى بنفسه قال فى كذا لقاء قبل كدة أن علاقته بالفنان سعيد صالح وعادل امام كانت علاقة صداقة بعيد عن الفن و اشتغلوا سوا كتير و كل واحد مننا ممكن يقول كلمة عفوية دون قصد غلط .... و خصوصآ لما تتطلع الكلمة من جيل والدك و والدى لأن ده جيل عظيم و فاهم و واعى و خصوصآ انهم جيل واحد كمان و الجيل دا معروف بالحب أصلا لحد دلوقتى كمان.
وأضاف مراد قائلأ: و ان كانت كلمة طلعت غلط أو سوء تفاهم حصل بشكل مفاجئ مش معناه انه غلط لا سمح الله فى الاستاذ سعيد أو بيقل من شأنه رحمة الله عليه و راعوا يا جماعة كبر السن و العفوية فى الكلام للناس الكبار ... الناس دى فنانين كبار و اكبر من اننا نلوم عليهم او نحاسبه بالكلمة ... لأن سعيد صالح دة نجم كبير و فكرى صادق فنان كبير برضو .. و شكرآ المهتمين و عارفين ان دة مش طبع والدى و ان عمره فى الوسط الفنى ما حد زعل منه.
وتابع: الحمد لله احنا ناس فى حالنا مش بتوع مشاكل ولا تريند علشان الناس تعرف مين فكرى صادق أو نقيس بالتريند شعبية نجم كبير زى الاستاذ سعيد صالح ؟؟؟ و ربنا يرحم الجميع كل من عليها فان يا جماعة و كلمة ( فنان عادى) كلمة لا تقليل شأن ولا سب و قذف لأي حد ..
وانا بيربطنى صداقة و زمالة مع اختى المونتيرة المبدعة (هند سعيد صالح) من خلال المعهد العالى للسينما و انا من عشاق النجم سعيد صالح و اشتغلت معاه مسلسل و كان انسان جميل و دمه زى العسسسل و قعدنا اتكلمنا كتير عن ذكرياته هو و ابويا سوا كتير ... و رغم ظروفه المرضية الا انه كان قيمة كبيرة جدا فى المكان و الناس الكبيرة بيبقى معاهم عذرهم احيان كتير .. طالما لا يوجد اهانة او سب لا سمح الله .. يبقا الموضوع سؤ تفاهم و لازم توضيحه بشكل صحيح للناس فى اقرب وقت.
وتابع: لكل عشاق النجم سعيد صالح و انا اولهم طبعآ بس احتراما منكم و رجاء و ليس أمرا من حضراتكم ... بلاش نكبر المواضيع و نشمت فى بعض بالسرعة دى و نعلق لبعض المشانق علشان ممكن الحكاية تتفخم و يبقا موقف و يزعل ناس و اخوات و أصدقاء من بعض عشرتهم و صداقتهم قد عمر جيل كامل زى جيلنا الحالى ... و ستستمر العلاقة الطيبة بين الأبناء لأخر العمر بأذن الله و لن تتغير او تفسد بسبب كلمة او وجهة نظر اتقالت على الهوا بشكل عفوي.. دون مونتاج او تجميل للكلام من فنان له تاريخه و أعماله و عمره يتجاوز السبعين الحمد لله و هو والدى الفنان فكرى صادق والله يا جماعة إللى حصل دة بيحصل فى معظم البرامج المسجلة و بيحصل اكتر من كدة كمان و كلنا عارفين و فاهمين لكن برنامج الاستاذة لميس الحديدى .. برنامج على الهواء مباشرة لو كانت حلقة متسجلة ماكانش حصل كل دة ... الحمد لله و كامل اعتذارى بشكل اخوى لأختى الغالية هند سعيد صالح و للنجم الراحل سعيد صالح .
