EN
كشف الرئيس عبدالفتاح السيسي، خلال كلمته بافتتاح مشروعات قومية بمحافظة القليوبية، تفاصيل حديثه مع محافظ البنك المركزي بشأن حل مشكلات الاقتصاد.. فماذا دار بين الرئيس والمحافظ؟
تحدث السيسي، اليوم، بلسان العديد من المصريين، الذين يتساءلون: طب انتوا النهاردة جادين في حل مسائل المستوردين والمستلزمات؟، ليجيب الرئيس: آه طبعا، اتكلمت مع محافظ البنك المركزي عشان مش عايزين مشكلة تقابل رجال الصناعة في مصر.
موعد حل مشاكل الاستيراد
وأضاف الرئيس السيسي: “مفيش حاجة بنخبيها عليكم في ظل ظروف قاسية على العالم كله، حتى على الدول الصناعية والمتقدمة، لكن أزمتي كورونا والحرب الروسية ليها صدمة كبيرة وبنحاول يكون لها أقل تكلفة، بتصور خلال شهر أو 2 بالكتير، تكون كل المعوقات اللي بنقول عليها خلصت”.
وأوضح: زيارتنا اليوم، الهدف منها إننا نؤكد إننا مهتمين بالصناعة ودعمها وتسهيل كل المعوقات والمصاعب اللي بتقابلها لإننا مش بعيد عن ده.
الرخصة الذهبية
تحدث الرئيس عن مقترحات لحل مشاكل الاقتصاد، وعلى رأسها الرخصة الذهبية، موضحا: “الرخصة الذهبية بتسهل إجراءات كتير جدا، والكلام لينا كدولة، جهات الولاية كتير، وقلنا نعمل شباك واحد، واتكلمنا إننا ندخل على مناطق بعينها ونديها كل الموافقات عشان رجال الصناعة يدخلوا”.
100 مليار دولار صادرات
كما تحدث الرئيس السيسي، عن هدف الدولة التي تسعى لتحقيقه خلال الفترة المقبلة، قائلا: “محتاجين صادرات 100 مليار دولار، وده مش كتير على مصر”.
المؤتمر الاقتصادي المصري
تطرق الرئيس أيضا إلى المؤتمر الاقتصادي الذي سبق ودعا إلى إقامته في مصر، قائلا: “المؤتمر بيدي فرصة لرجال الأعمال فرصة إنهم يتكلموا عن المشاكل، وده أمر مش عيب، بنعرضه عشان يكون فيه حل، كل مشروع عبارة عن دخل إضافي لكل إنسان بيشتغل في المشروع، وده الهدف، حجم العمالة الكبيرة في مصر وأجور العمالة بتاعتنا مش كبيرة”.
وتابع: “محتاجين نتوسع في تدريب وتمكين العمالة المصرية، وبنشجع رجال الأعمال إنهم يساعدوا معانا في إعداد وتأهيل الخريج لفرصة حقيقية للعمل”.
مراكز البحوث والتطوير
وأردف السيسي: إذا كنا نتحدث عن الأراضي والتخصيص، أو العمالة المدربة بمشاركة ناجحة، يتبقى مراكز البحوث والتطوير في مصر، وهي كتير لكن مهم نربطها مع رجال الأعمال اللي موجودين في مصر، لأنها هتوجد حلول لمشاكل محتاجة تطوير.
واختتم الرئيس كلمته، معلنا: “خلال الفترة اللي جاية هنتوسع وهنروح لمصانع كتير ونشوف نماذج كتير ناجحة، عشان نشجعها ونوريها للناس، حجم القطاع الخاص في مصر يتعدى 75 % على الأقل.”
