علق رضا عبد العال، لاعب الأهلي والزمالك السابق، على فوز منتخب مصر بقيادة روي فيتوريا على النيجر بنتيجة 3/0.

وقال رضا عبد العال خلال لقائه ببرنامج "اللعيب" الذي يقدمه الإعلامي مهيب عبد الهادي بقناة "MBC مصر": "روي فيتوريا شروة وبلونا بيها، إحنا كنا بنقابل فرقة أ ب في الكورة، وملهاش أي شكل ولا تواجد في الكرة، وفي المؤتمر الصحفي محسسنا إننا كسبنا فرقة كبيرة مع إن مركز شباب المرج يكسبها بإسكور".

وأضاف: "فين شخصية المدرب في ماتش النيجر؟!، وكان قاعد زينا بيتفرج مع إن من أبجديات الكرة إنه بيرجعنا تاني لكوبر؛ باصي لصلاح".

ولفت رضا عبد العال الى: "فيتوريا قعد تريزيجيه لحد الدقيقة 74 ومنزل عمر مرموش اللى معملش حاجة طول الماتش، ده أحمد مدبولي قد مرموش 100 مرة، وطارق حامد ولا باص صح، إنت جايبه ليه؟ أحمد حجازي بتلعبه 90 دقيقة ليه؟ ليه متجربش ناس تانية؟ والجواب بتاع فيتوريا بان من عنوانه.. إنه ملوش فيها".

وتابع: "أنا هرشت فيتوريا ده إمبارح لما اتكلم في المؤتمر الصحفي عن محمد عواد، وتبرير عدم ضمه لمنتخب مصر".

وأكد رضا عبد العال: "روي فيتوريا لعب أمام النيجر بخطة اللي عايزه حازم إمام هيمشي، وطالما حط ودانه لغيره ننسى منتخب مصر".

فوز منتخب مصر على النيجر..

تغلب منتخب مصر الوطني على نظيره منتخب النيجر بثلاثية نظيفة في المباراة الودية التى أقيمت بينهما على ملعب استاد الإسكندرية مساء اليوم.