EN 
قال الفنان كريم محجوب إنه تخرج في كلية الهندسة ولكن ترك مهنة الهندسة حباً في الفن، معقباً: "أنا مكنتش أعرف إن أنا بحب التمثيل غير لما دخلت الكلية، وحبيت التمثيل في المسرح داخل الكلية، بعد ما تخرجت قلت هطلع فكرة التمثيل دي من دماغي وهشتغل بشهادتي".
وأضاف "محجوب"، خلال استضافته ببرنامج "صباح البلد" المُذاع على فضائية "صدى البلد": "وبالفعل اشتغلت فترة مهندس بس مقدرتش أبعد عن التمثيل وقدمت في معهد فنون مسرحية والحمد لله اتقبلت في أول مرة قدمت فيها وبعدها حياتي اتغيرت، وحوار إني أسيب الهندسة وأتجه للتمثيل مش سهل، وبيكون صعب خاصة في الأول لأن كل اللي حواليا بيبقى مستغرب ورافض الفكرة بنسبة كبيرة".
وتابع: "أنا أهلي كانوا مصدومين لدرجة إنهم مكانوش عارفين يعملوا إيه، وكنت حالة عجيبة للناس كلها، بس هي بتبقى محطات في طريق الواحد دايماً ربنا هو اللي بيكون كاتبه لنا وبتغير حياة الواحد خالص".
وأكمل "محجوب" قائلاً: "أنا قدمت في المعهد واتقبلت وكنت شاطر جداً وبدأت أعمل أعمال مسرح ونسافر نعرضها خارج مصر، فلقيت الحياة بتاخدني بقى ناحية التمثيل خالص، وقلت يبقى هو ده الطريق اللي ربنا كاتبهولي".
