EN
ضجت مواقع التواصل الاجتماعي، بعد تداول منشور لفتاة تدعى إسراء طارق، كتبت أن والديها توفاهما الله، وتعرضت للظلم من أعمامها للحصول على نصيبهم من المنزل الذي تركه والدها، وتستغيث بأي شخص يستطيع مساعدتها.
منشور مؤلم
تداول رواد التواصل الاجتماعي، منشورا مؤلما لفتاة تتعرض لظلم من أقرب الناس لها، من اعمامها الذين تكالبوا عليها ويرغبون في طردها إلى الشارع مع شقيقتها الطفلة للحصول على حقهم من منزل والدها المتوفي.
وكتبت الفتاة: "أنا ابويا توفى من سنة، وماما توفيت 26 رمضان اللي فات، عندي اخت صغيرة اربع سنين، ومليش اخوات اولاد، لي ٣ اعمام.. عايزيني أبيع البيت عشان ياخذوا ورثهم فيه، وأنا مليش مكان ولا مأوى لي او لأختي غير بيتنا ده".
وأضافت: "نصيبنا مستحيل يجيب لنا شقة، وانا مش عارفة اروح فين، فهل فيه قانون يوفر لي مسكن، لأننا بنات وملناش مأوى غير بيتنا ده".
وتابعت: "انا انضربت كذا مرة من عمي الكبير عشان أمضي، وخايفة امضي ابقى في الشارع، واهل ماما من ساعة ما اتوفت ما سألوش عليا ولو باتصال، انا مش معترضة على حقهم، انا عايزة نقعد في البيت لحد حتى ما اتجوز وخذ اختي معايا، لكن اروح فين دلوقت وانا معنديش دخل خالص للايجار بره، لان مفيش دخل لأكلنا وشربنا اصلا، وعايشة على السلف لحد ما اقبض معاش بابا وماما، وماديا حاليا مش هاقدر أرفع قضية لاني مش معايا اتعاب المحامي".
واختتمت: "عايزة اعرف، فيه حاجة ممكن تخليهم يسيبوني قاعدة في البيت لفترة مؤقتة لحد مثلا ما اتجوز وآخذ اختي؟ ولا ايه!! ارجو تفيدوني".
نهاد أبو القمصان تدعم الفتاة
نشرت المحامية نهاد أبو القمصان، منشور الفتاة عبر صفحتها على فيس بوك، مطالبة الفتاة بالتواصل معها، موضحة الملابسات القانونية التي تجعل من حقها الاستمرار في منزلها.
وفندت أبو القمصان الحجج القانونية وكتبت: "البنتين اللى عمهم عايز يستولى على ميراثهم، حد يوصلنى بهم، كل اللى كتب البوست يبعت لى وسيلة أتصل بيها وربنا يقدرنى وأحميها هى وورثها.
وأضافت: "بطمنكوا فيه حلول قانونية كثيرة ممكن نستخدمها للحفاظ على ميراث البنات، بالنسبة للحالة دى تحديدا:
١- العم ملزم بالانفاق على بنات اخوه وممكن يرفعوا قضية نفقة عليه "ما هو شرعا الميراث قدامه مسئولية".
٢- البنت الصغيرة "٤ سنين" يعنى البيت كله تحت رقابة المجلس الحسبي "لو العم مبلغش المجلس الحسبي دى جريمة".
٣ - الاعمام الثلاثة كلهم نصيبهم اول عن اخر حوالى السدس "١٥٪"، لان البنتين هايورثوا الاول نصيب الام اللى ورثته من الاب، لانها توفيت بعده، وده "الثمن"، وهايورثوا نصيبهم "الثلثين"، يعنى ٣ اعمام الغفلة دول نصيبهم حوالى السدس كلهم كده على بعضهم ١٥٪ من البيت.
٤- تعرض البنات للضرب "جريمة ضرب" عقوبتها الحبس.
٥ - اللينك اللى عندى بتاع جروب عام اما بتاع البنت معلهوش البوست فياريت اللى يعرفها يوصلنا ببعض.
مجلس الوزراء يتدخل
وصباح اليوم، نشرت إسراء منشور آخر، كتبت فيه: "صباح الخير، انا نزلت البوست في جروب قانون الاسرة المصرية، ونمت وصحيت لقيت الدنيا اتقلبت، وانا ما كنتش عندي امل 1% انه يحصل ربع اللي حصل معايا، كان غرضي من البوست اني اشوف حل قانوني ومحامي يقف جنبي لحد ما اقدر ارجع حقي".
وأضافت: "النهارده الصبح لقيت اتصال من مكتب رئيس الوزراء، وبتاخذ بياناتي عشان تساعدني في مشكلتي مع اعمامي، والاستاذة نهاد ابو القمصان نزلت البوست عندها وبتدور عليا عشان تترافعلي، وعايزة تتكفل بكل حاجة، وناس كثير قوي بيبعتولي يقولولي تتواصلي مع المحامية بتدور عليكي، واللي دخل يهون عليا ويقولي انا جنبك".
وتابعت: "شفت فيكم حنية مش في اهلي، ولولاكم ما كنتش وصلت لربع اللي انا فيه ده، مذيعين من قنوات عايزين يصوروا معايا ويصعَّدوا الموضوع، وناس ما اعرفهاش عايزة تقف جنبي من غير سابق معرفة، انا مرة واحدة لقيت عوض ربنا بيجيلي بدون مقدمات، وكنت فاكرة حياتي كلها سودة، الا ان عوض ربنا وطاقة النور ظهرت مع بداية صبح النهاردة، كل الشكر لكم ولكل الناس اللي وقفت جنبي حتى بالكلام، انا مدينة لكم بكل الشكر، والناس اللي دخلتلي وعايزة تساعدني ماديا، انا مش محتاجة فلوس، وما طلبتش من حد فلوس، انا كل اللي كنت محتاجاه من البوست اللي نزلته محامي يتولى قضيتي، واتعابه ياخدها بعد ما يرجع لي حقي، لكن انا مش محتاجة مساعدات مادية من حد".
واختتمت: "شكرا جدا لكل اللي عرض، ربنا يجعل دعواتي لكم كلكم من نصيبكم، بدون مبالغة انتم حيتوني انا واختي من جديد".
