مسكها من منطقة حساسة.. تفاصيل التحرش بالمطربة شيرين عبدون بعين شمس| فيديو

«ده مسكني من أجزاء حساسة في جسمي، المتحرش القذر».. بتلك الكلمات بدأت المطربة الشابة شيرين عبدون، حديثها لـ صدى البلد، لتكشف لنا تفاصيل قيام سائق توك توك بمنطقة عين شمس بالتحرش بها أثناء سيرها في الشارع.

بعد تعرضها للتحرش.. المغنية شيرين عبدون تكشف تطورات أزمتها |خاص

استدرجه داخل المقابر.. القبض على مسجل خطر تحرش بطفل في الدقهلية

تفاصيل الواقعة

قالت المطربة الشابة شيرين عبدون: "أنا بحكي قصتي علشان كل بنت يحصل تحرش ليها تاخد إجراءات قانونية ضد المتهم وتعرف تاخد حقها وتعرف إن وزارة الداخلية هتتحرك في أسرع وقت لضبط مرتكب الواقعة، واللى حصل إني كنت رايحة الشغل بتاعي الساعة 10 الصبح، وكنت لابسه لبس هدوم واسعة مفيهاش حاجة خارجة عن المألوف، وكنت ماشية في جسر السويس بشارع فيلا 23، ولقيت سواق توك توك جاى في الاتجاه المقابل ليا واحرش بيا جسديا ولمس أجزاء حساسة من جسدي، وده كان موقف بشع جدا ليا".

صدمة من واقعة التحرش

وأضافت شيرين عبدون:"أنا بعد اللى اتعمل ده حصلي صدمة منه، وملقتيش نفسي غير إني بجري ورا التوك توك، وبحاول أميز حاجة فيه رقمه أو شىء مميز فيه وبرمي عليه طوب، وبطلب من الناس يوقفوه لكن مفيش حد إتحرك، ومكنتش شايفة حاجة قدامي من اللى حصل، وجريت وراه لحد منطقة الجراج لكن مفيش أي تحرك من الناس إنه يوقفوه لحد ما هرب بأقصى سرعة".

نشر فيديو على السوشيال ميديا

وأوضحت شيرين عبدون: "بعد اللى حصل حاولت أعدى اليوم، ومكنتش شايفة كاميرات مراقبة في المكان، وكلمت حد من أهلى ووصل ووصلني لمكان شغلي، وبعدين عملت فيديو ونزلته على صفحتى وكنت فيه منهارة تماما ولحد دلوقتى لما بفتكر الموضوع بيحصلي توتر منه، وبعد كده لاقيت وزارة الداخلية تحركت على الفور وتواصلت معايا عن طريق ضابط شرطة".

تحرك الداخلية

وأكدت: "تحرك وزارة الداخلية معايا شىء جيد جدا في تلك الحالات، وتحركنا على مكان الواقعة وتم تفريغ الكاميرات اللى رصدت كل شىء في اللى حصلي، وفي أقل من 24 ساعة تم ضبط المتهم، ومن اللى حصل مكنتش باكل ولا بنام وتاني يوم الصبح كلموني وقالولي تعالي نكمل المحضر في القسم".

رؤية المتهم في قسم الشرطة

وتستكمل: "لما شوفت المتهم في القسم حصلي توتر شديد ومكنتش قادرة اتكلم ولا أقف من مكاني، وبعيط بس وهو اتحبس في القضية، والمتهم قبل ما يعمل اللى عمله محاولش يعمل حاجة لكن أنا فوجئت باللى عمله، ولما نشرت الفيديو بتاعي على السوشيال كان هدفي إنه المتهم يتم القبض عليه".

متابعة الداخلية

وتابعت:" الحكومة والداخلية بيتابعوا مثل تلك القضايا بشكل مستمر ويتم التحرك ضدها في اسرع وقت، وأنا لما شوفت المتهم وحصل ارتعاش في جسمي منه قالي أنا أسف إني عملت كده أنا غلطت، ومكنت ش قادرة أعمل أي حاجة ضده وسبت بابا عليه".

تواصل الداخلية معها

وتضيف:" لما الداخلية كلمتني قالولي احنا فعلا ميرضناش الموضوع ده يحصل وخلال وقت قريب سيتم ضبط المتهم وقولولنا مكان الواقعة فين بس وهيتم التحرك مباشرة ضد المتهم، وقالولى كمان دورك خلص لحد هنا وبالفعل تانمي يوم الصبح تم ضبط المتهم وفي النيابة قولت اللى حصلي والمتهم اعترف بارتكابه للواقعة، والقانون هياخد مجراه وكل واحد غلط لازم يتحاسب".

حالتي النفسية صعبة

وتستكمل:" المتهم عمل حاجة فيا مش ساهلة نفسيا وجسديا، وكل ما افتكر الموضوع مبقاش كويسة فعلا، ونصيحتى لكل بنت خدي حقك متسكتيش ومتسمعيش لحد بيقولك دي لابسه أو مش لابسه وأنا مكنتش لابسه حاجة ضيقة أو حاجة تغري المتهم إنه يعمل كده، وربنا ما يخلي البنات تتعرض لموقف زي ده علشان مش حلو، ومش بتمني لحد غيري يحصله كده ولو حصل خدي حقك وأمشي في الإجراءات القانونية ومتخافيش من حاجة وربنا معاكي قبل أي حد".

شكر وزارة الداخلية و نصيحة للفتيات

واختتمت: "أنا كان في نار في قلبي وتدخل وزارة الداخلية في الأمر طفى النار دي، وبشكرهم من كل قلبي وهم بيهتموا بالمواضيع دي للحد منها والقضاء عليها، والسوشيال ميديا دورها مساعد في كشف الوقائع ولكن وزارة الداخلية تتحرك فورا تجاه أي بلاغ، وبقول لكل بنت خلوا بالكوا من نفسكوا وأي حد يتعرضلك متسكتيش عن حقك، وخدي كل إجراءاتك القانونية وهتاخدي حقك".

الرأي القانوني في عقوبة المتهم

فيما قال خليل إبراهيم محامي الفنانة الشابة شيرين عبدون أن ما حدث هو فعل مشين ومهين للشخص الذي ارتكب الجريمة وكذلك للمواطنين اللى وقفوا يتفرجون على الواقعة دون تحرك منهم لردع المتهم، وأن رجال الداخلية كانوا على قدر المسئولية بضبط المتهم خلال ساعات بعد إرتكاب الواقعة.

وأضاف إبراهيم أن المتهم أثناء قيادته مركبة التوك توك الخاصة بها ارتكب الجريمة ولامس أجزاء حساسة من جسد المجني عليها وفرا هاربا، وأن ذلك وصفه في القانون هو هتك عرض بالقوة وفقا للمادة 268 من قانون العقوبات، وتلك عقوبتها السجن المشدد من 3 سنوات وما فوقها.

وأوضح أن الجريمة تحتوى على تعدد معنوي في الاتهامات ضد المتهم وفقا للمادة 306 مكرر أ، الخاصة بالتحرش الجنسي وفقا للتعديل الأخير لقانون العقوبات، والتى قام المتهم بالتعرض للمجني عليها في طريق عام وتلك عقوبتها من سنتين إلى 4 سنوات، ولكن تلك الجريمة تندرج تحت القيد والوصف الخاص بجريمة هتك العرض وفقا للمادة 268 من قانون العقوبات.

وأكد إبراهيم أن تلك القضية لا يجوز التصالح فيها وفقا للقانون، والمتهم اعترف بجريمته بعد ضبطه، وانه سوف يتم إحالته للمحاكمة خلال الأيام القادمة لإجراء محاكمته وفقا للقانون، وأن المتهم بفعله ذلك سوف يتم سجنه بمدة لا تقل عن 3 سنوات، وأهل المتهم حاولوا التواصل من أجل التصالح واستعطاف المجني عليها المطربة الشابة شيرين عبدون ولكن تم رفض تلك المحاولات وإتخاذ الإجراءات القانونية حيال المتهم لعقابه عما بدر منه.