أكد الإعلامي أحمد شوبير أن الدولي محمد مجدي أفشة صانع ألعاب الفريق الأول لكرة القدم بالنادي الأهلي رفض بشكل قاطع الرحيل عن القلعة الحمراء في حال رفض المسئولون العرض التركى.

وقال شوبير في تصريحات إذاعية "حدث اتصال بيني وبين أفشة وقالى ليا عتاب عندك يا كابتن، أنت قولت إنى اتأخرت فى إجراء جراحة فتق البطن، وأنا هشرحلك الأسباب".

وتابع "أفشة قالى ياكابتن كان عندى فتق يمين قبل ما أجى الأهلى وعملته، وبعدها جالى الفتق الشمال، وبلعب بقالى 5 شهور وأنا بتقطع ومقدرش أفتح بوقى عشان الظروف اللى فيها الأهلى، وبقالى 3 سنين مخدتش إجازة فقلت أخد إجازة 15 يوما وبعدين أعمل العملية، وده اللى حصل، وهفك السلك النهارده، وابدأ الجرى من بكره بشكل عادى".

وأضاف "أفشة قالى إن فيه عرض تركى بالفعل وكيله بيتناقش فيه مع مسئولي الأهلى، بس لو الأهلى رفض قالى نصاً مقدرش أقول للأهلى لأ أنا كنت عندك في برنامجك وقولتلك حلمى أنى ألعب في الأهلى، لكن لو الأهلى رحب بالعرض يبقى لازم أشوف أكل عيشى".

وأتم "أفشة قالى أبويا بيخاصمنى لما الأهلى بيخسر وبيكون يوم نكد علينا كلنا، وأفشة كمان لمحلى أن ممكن يكون في تمديد تعاقد لعقده مع الأهلى الفترة الجاية".