الوفاء في أفضل صوره.. طبيب يقبل يد معلمته في المرحلة الابتدائية| فيديو

قال الدكتور هاني غيث، مدير مستشفى الرمد في دمنهور، إن كامليا عبد المسيح كانت مُعلمته في المرحلة الابتدائية وتدرس له هي زوجها، معقباً: "إحنا كنا في قرية نائية كده في عزبة حسن مبارك وهي كانت بتيجي هي زوجها من مسافة حوالي 3 أو 4 كيلو في عز الشتاء".

وأضاف "غيث" في مداخلة هاتفية مع برنامج "8 الصبح"، المُذاع على فضائية "dmc"، قائلاً: "كانوا بيشرحولنا بضمير أوي .. ومكنوش بيحسسونا إنهم معلم ومعلمة وتلميد لأ .. ده أب وأم بيعاملوا أولادهم .. ولما كنا بنغلط ومستوانا يقل كانوا بيعاقبونا عادي".

وتابع مدير مستشفى الرمد في دمنهور قائلاً: "لذلك أنا عمري ما أقدر أنسى معلمتي كاميليا ولا أقدر أنسى الأستاذ سعد زوجها .. عصاية معلمتي وإيدها الجميلة هي اللي جعلت مني دكتور حالياً .. والحمدلله مدير المستشفى الأولى على مستوى الجمهورية في القضاء على قوائم الانتظار التابعة للمبادرة الرئاسية".

وأكمل "غيث": "هي جت العيادة عندي علشان تكشف على عينيها .. وكانت عارفة إن أنا هاني تلميذها .. لأن أنا كنت قابلتها مرتين بعد المرحلة الابتدائية .. والمرة ديه التالتة .. المرة الأولى قابلتها في الشارع وهي معرفتنيش وأنا اللي عرفتها .. كنت في الثانوية .. وعرفتني من اسمي لإنه كان مختلف شوية .. وساعتها قالتالي انت لازم تدخل كلية الطب وحسيت اني تحملت المسئولية".

ونوه مدير مستشفى الرمد في دمنهور، أنه قابلها المرة الثانية منذ حوالي 7 سنوات، معقباً: "كانت عرفت وقتها إني دكتور وكشفت عندي في العيادة .. وقبلت ايدها وراسها بردو وقتها .. والمرة ديه بردو بعد 6 سنوات جاتلي وقبلت ايدها وعلى رأسها .. ووالله لو كانت سمحتلي أبوس على رجلها كمان كنت عملتها".