EN 
انتقد محمد بركات تصريحات ريكاردو سواريش المدير الفني لفريق الكرة الأول بالنادي الأهلي، عقب لقاء المصري حول عدم الاعتماد على بعض اللاعبين الناشئين.
قال بركات في تصريحاته عبر برنامج الريمونتادا على قناة المحور: "الكلام اللي قاله سواريش بعد مباراة المصري مش مقنع بالنسبة لي، كنت أتمنى إنه يكمل باللاعبين الناشئين زي أحمد سيد غريب وزياد طارق" .
أضاف: "انت خايف من ايه ما تلاعب الناس دي، لاعيبة عندها شخصية قوية، وأثبتت ده قدام الاتحاد" .
وختم حديثه قائلا: "لكن برضو الكورة مش عافية ولازم ندي لسواريش فرصة قبل الحكم عليه، ادي لسواريش فرصة الأول قبل الحكم عليه".
كما انتقد محمد بركات مستوى صلاح محسن مهاجم فريق الكرة الأول بالنادي الأهلي، موجها نصيحة خاصة للاعبي الأهلي.
قال بركات: "كل الأندية في الدوري بتستفاد وبتضر من التحكيم، ولو هتكلمني عن ماتش الأهلي والمصري ما انت ممكن تشوف ماتش فاركو جون الأهلي وفي كلام يتقال عليه"
وعن فرصة صلاح محسن مهاجم الأهلي في مباراة المصري قال: "صلاح مش مصدق نفسه إنه ضيع الفرصة، ولو جاتله 100 مرة كان هيجبها، صلاح محسن المفروض هداف وكان باين إنه لاعب كويس من وهو في إنبي وكان سبب في ارتفاع الأسعار بالنسبة للاعيبة المصرية"
وختم حديثه قائلا: "الفترة الجاية في الأهلي محدش يأمن، أوعى أي لاعب يضمن إنه ممكن يكون موجود، اللاعب اللي هيقعد، هو اللي الإدارة والجهاز الفني، شايفين إنه يستحق يقعد مهما كانت نجومية اللاعب، وشوفنا زياد طارق عمل ايه في ماتش الاتحاد فهو مشروع نجم ومشروع هداف وكذلك أحمد سيد غريب"
