EN 
القايمة والمهر على العريس جملة كانت محل بحث ملايين المصريين خلال الساعات القليلة الماضية بعد قيام أحد الأشخاص ويدعى «إسلام عبد المقصود» بإشاعة ذلك من خلال منشور عبر حسابه الشخصي ليقوم بعدها آلاف الأشخاص بتدوله مازحين أو مصدقين.
وفي هذا السياق، شاركت شابة مصرية تجربتها مع القايمة والمهر عند زواجها من شاب كوري، مفجرة مفأجاة أدهشت متابعيها عبر صفحتها الرسمية الموثقة على موقع «فيسبوك» والتي تحمل اسم «Kim Koke».
وقالت الزوجة المصرية، إسراء السقا، والمتزوجة من الكوري «كيم ريان» في بداية منشورها: «ما كنتش عايزة أتكلم في موضوع القايمة ده بس بما إن ناس كتير سألتني عن الزواج في كوريا بيكون عامل ازاي وهل في قايمة كمان في كوريا ولا لا؟».
الزوج الكوري عن القايمة: أنا اللي هجيب كل شيء
وأوضحت الزوجة المصرية ما حدث معها بشأن القايمة والمهر: «لما جينا نتجوز أنا وريان قلتله أنا مطلوب مني إيه أجيبه في البيت؟….فبص ليا باستغراب قالي أنا اللى هجيب كل شيء، إنتي مش هتجيبي حاجة ديه العادات في كوريا إن الزوج بيجيب كل شيء، والزوجة ما بتجبش أي شيء زي ما الشرع بيقول عندنا في كوريا بيعملوا كده».
الزوجة المصرية: رفضت دا واشتريت كل الفرش
من جانبها، أوضحت له الزوجة التي قررت المشاركة بقصتها في تريند «القايمة سقطت»: «قولتله لا إحنا في مصر بنجهز النص بالنص علشان نساعد بعض، قالي إنتي عايزة تعملي إيه وانا معاكي.. الزوج في كوريا بيشتري الشقة على حسب اختيار الزوجة، يعني كنا بنروح نشوف الشقق وأختار حسب رغبتي، والفرش بتاع البيت كله اتفرش على ذوقي وذوق ريان وعلى قد احتياجاتنا.. أنا اشتريت الفرش كله والأجهزة بالكامل واخترناه على حسب زوقنا».
وواصلت الزوجة المصرية: «لما جيت أدفع تمن العفش حمايا وحماتي رفضوا وقالوا لا إنتي ما تجبيش شيء ديه هدية مننا ليكي، لكن أنا رفضت لأني حبيت أأسس بيتي بمجهودي أنا وريان علشان نبقى مبسوطين واحنا فيه ومش كلفت لا أهلى ولا أهله شيء، ولا حماتي جت فتحت دولاب وشافت فيه إيه ولا قالت ماجبتيش مش عارفة إيه ليه ولا حتى بتدخل البيت عندي إلا لما تتصل تستأذن الأول».
الزوجة: حمايا وحماتي احترموا اختيارنا وخصوصيتنا
وأردفت المتزوجة من كوري: «رغم إني أكتر من مرة قلت ليها تعالي بدون اتصال وهي معاها الباسورد بتاع باب الشقة، إلا أنها بترفض وبتقولي ده بيتكم وخصوصيتكم لازم أستأذن».
موقف المهر مع الزوج الكوري
وتابعت الزوجة إسراء السقا: «نيجي للمهر ساعة كتب الكتاب في المسجد ريان قالي قولي المهر اللى انتي عايزاه وانا فعلا ماقلتش لأني ماكنتش بفكر فيه.. أنا بفكر في شريك الحياة اللى هيصوني وهصونه ويكون ليا سند وضهر وأمان وأب لأطفالي اللى هيشكروني عليه بعد ما يكبروا وكتبنا الكتاب بالمهر المناسب ليا واللى كان شيء رمزي لأنه مش مهم بالنسبة ليا».
واستطردت في ظل حديثها عن القايمة والمهر: «طبعا جبنا الشبكة اللى هي خاتم الزواج وبيكون من الألماظ ودبل الزواج اللى التصميم بتاعها اتعمل مخصوص لينا بس.. وده ريان كله دفعه لأن دي عاداتهم، مش اللى بيبيع الشبكة لمراته تاني يوم واللى هي مش من حقه أساسا وديه حق الزوجة فقط، الفرح بالكامل واللى اتكلف مبلغ وقدره والصور والكوافير... إلخ كله كان على ريان لأن دي عاداتهم وتقاليدهم».
وقالت: «حتى الحاجات اللى كانت في شقتي قبل الزواج رميتها لأن جبنا كله جديد وريان قالي لو عايزة حاجة منهم عادي مش مشكلة أو ارميهم وهجيب ليكي جديد، كمان الشبكة والهدايا والفلوس... إلخ اللى بتاخدها العروسة هنا مش بتسترد نهائي حتي لو في حالة الطلاق لقدر الله».
إسراء: الزوج الكوري بيشارك زوجته الأعمال المنزلية
ونبهت: «كمان الزوج بعد الزواج بيهتم بالبيت بالظبط زي الزوجة، يعني أنا أطبخ هو يغسل المواعين، أنا أرضع البيبي هو يغير ليها البامبرز، أنا يوم أنيمها هو يوم ينيمها أنا اغسل الغسيل هو يطبقه لأن الزواج مشاركة رغم انه بيشتغل إلا إنه لازم يساعد في البيت حتى مصاريف البيت عليه لأنه الزوج، مش بيقول روحي خلى أهلك تدفع مصاريف علاجك ولا حملك... إلخ».
إسراء: ما الفكرة من القايمة وما وضعها في كوريا؟
ونوهت: «الفكرة بقا في القايمة ديه ليه؟ علشان تضمن حقوق البنت بعد ما الفترة الأخيرة شوفنا كمية غدر من الطرفين كمان القايمة ديه بتكون فيها حق الزوجة الحاجات اللى جابتها بس، يعني مثلا لو حصل طلاق ممكن تطردها من شقتها لو هي مش حاضنة أو تبيع شقتك لأبوك أو أمك علشان بس ماتقعدش فيها مع أولادك، وفي ناس بتطلق الأم بعيالها ومايصرفش عليهم نهائي، فأهل الزوجة بيعملوا القايمة ديه لحماية بنتهم من الزمن».
وحول تفاصيل القايمة، أردفت: «طيب هل في كوريا حماية للزوجة؟ أيوة القانون هنا موجود وبيدي الحقوق بالكامل للزوجة يعني لو لقدر الله حصل طلاق باخد حقوقي كاملة سواء كورية او اجنبية، طيب حضانة الاطفال ؟ بتكون مع الشريك اللى ما غلطش يعني مثلا، الزوج خان الزوجة الحضانة تروح للأم أو العكس ويتكفل الطرف المخطئ بمصاريف الأولاد سواء كان بقا الطرف ده الأم أو الأب».
وأكملت الزوجة المصرية من شخص كوري: «الخلاصة إن لما بنيجي نجوز بنختار الشخص اللى بيكون الأمان والسند ليكي واللى يكون أول واحد واقف في ضهرك وسندك وبتحسي جنبه إنك في ملاذ آمن، الزواج قائم على الحب والمودة والرحمة والتفاهم مش مين جاب بكام ولا جاب منين ولا إيه؟ الزوج يكون نعم الرجل والسند والأب ليكي ولأولادك، والزوجة تكون نعم السيدة السند والأم ليه ولأولادك، تعيشوا سوا على الحلوة والمرة بتتشاركوا كل شيء في البيت والحياة وتربية الأطفال والمعيشة لأنكم بتبنوا اسرة كلها حب وحنان وأطفال سوية، حتى لو لا قدر الله حصل طلاق يكون بمودة ورحمة مش بهدلة وقتل... إلخ».
واختتمت المشهورة باسم «كوكي كيم»: «الكل بقا بتخاف من الزواج من اللى بيشوفوه حواليهم وأنا كنت أولكم.. لكن لما تلاقوا الشخص المناسب اللى فعلا يخاف عليكم من الهوا، ويكون جنبكم في كل وقت وفي أي وقت تحتاجوه اتجوزوا، اللى بيقول إحنا مش انا اتجوزوه، اللى بيحترم تفكيركم ورغباتكم وأحلامكم اتجوزوه، اللى بيساعدكم تكونوا سوا سعداء رغم الإرهاق في الحياة اتجوزوه، غير كده بلاش تتجوزوا لمجرد الزواج، ودمتم بخير، وملحوظة: ديه صورتنا لما كنا بنشوف العفش بتاع بيتنا».
