حالة كبيرة من الصدمة أثارتها البلوجر مريم سيف بين الفتيات والسيدات خاصة على السوشيال ميديا بعد إعلانها رفعها قضية «طلاق للضرر» على زوجها الفلونسر محمد شرف موضحةً أن السبب الرئيسي أنها من تحملت الجزء الأكبر من تكاليف الزواج وولادة ابنتهما ونفاقتهما الخاصة، وهو ما أثار حالة من الجدل والتعاطف معها حيث كان الكثيرون يتخذون قصة حبها وزاجها من محمد شرف نموذجا مثاليا يرجون أن يحظوا بمثله وفقا لما يراه الملايين المتابعين لهما عبر منصات التواصل الاجتماعي خاصة تطبيق الصور والفيديوهات «انستجرام».

ومما يستدعي الاهتمام إعادة متابعي مواقع التواصل إلى الربط بين أزمة البلوجر مريم سيف وزوجها محمد شرف وبين أزمة البلوجر والتيك توكر آمال أبو المجد وزوجها أحمد جوبا، حيث كانت قد أثارت ضجة قبل أيام قليلة بعد مشاركة مقاطع فيديو مصورة عبر خاصية«استوري» بانستجرام تتحدث خلالها عن تعرضها للتعدي من زوجها، أحمد جوبا، فضلا عن تعرضها لمحاولة إجهاض جنينها، معلقة: «يؤسفني أقولكم إن جوزى أحمد اللى كنتوا كلكوا بتشوفوه بيحبني أهو اللى بيحب، شوفتوا الرجولة؟.. إيه رأيكم كان عايز يجهض الجنين».

يرصد لكم هذا التقرير ما حدث بين مريم سيف ومحمد شرف؟

الزوج يتجنب الحديث عن المشاكل الزوجية: اطمنوا المطعم بخير

نشر زوج البلوجر مريم سيف، «محمد شرف» مقطع فيديو أمس يتحدث فيه عن أزمات تواجه عمله بسبب عدة مشاكل تجمعة بزوجته مريم سيف مع عدم الإفصاح عن أي تفاصيل خاصة بها والتركيز على مطعمه في حديثه، قائلاً: «يا مساء الفل عليكم، ويا رب تكونوا بخير، طبعا أنا مختفي الفترة اللي فاتت، وناس كتير واخدة بالها وإنه فيه مشاكل وحاجات مش صح بتنزل، بس أنا مش بحب أطلع اتكلم في أموري ما بيني وما بين “أم بنتي” .. لكن اللي هتكلم فيه مشكلة المطعم والأذي اللي بيحصل من تشهير وابتزاز ودا مش صح، وبخصوص الأكونت ومعاها الباسورد وغيرت وشالت من عليه كل الداتا، بحجة إنه الأكونت بتاعها».

وتابع الزوج المشهور عبر منصات السوشيال ميديا: «حابب أكد لكم إنه شغلي للمطعم مستمر زي ما هو، لا هقفله ولا هفتح جديد بدل منه، ولازم أؤكد إننا بنتقي ربنا وفريق العمل في كل أكل يقدم لكم، وبنعمل البيتزا بمياه معدنية، وكل حاجة كويسة، والمشاكل لا ينفع بسببها أذية شركاء ليه، لأن المطعم فاتح بيوت ناس، وبنتوسع أكثر، اطمنوا من ناحيته».

مريم سيف: تسبب في إهانة الناس ليّه بالكومنتات.. وكنت بحلل “كانسر” ومقلتلوش

من جانبها، ردت الزوجة المشهورة عبر تطبيق «انستجرام» خاصة حيث يتابعها أكثر من 2 ونصف مليون شخص معلقة عبر خاصية «استوري» بأكثر من قصة، قائلة: «كنت ساكتة ومحبتش أخرب بيتي.. ومن يوم ولادة بنتي أنا المتكفلة بكل مصاريف البيت.. أنا أول مرة هقولها في العلن.. أنا بحلل كانسر ومقلتلوش.. أصل هتسند على مين»، كما نشرت أيضًا تسجيلات صوتية توضح فيها مشاكل حدثت بينهما من اهتمامه بالإنفاق على عمله وعدم الإنفاق عليها وابنتهما، إضافة إلى أنه لم يكن بجوارها في فترات تعبها، لافتة إلى نيتها في رفع قضية «طلاق للضرر» بالأوراق والمستندات، ومختتمة أنها ستكمل حياتها بشكل طبيعي واصفة اليوم الجمعة الذي يعد الذكري السنوية الثانية لزواجها بأنه «سيكون عيد طلاقي» وأنها أحضرت «بلايين» للاحتفال غدا بعيد ميلادها.

صدمة بين متابعي مواقع التواصل: كانوا بيمثلوا لينا أجمل قصة حب وزواج

عبر عدد من متابعي مواقع التواصل الاجتماعي عن استيائهم مما حدث مع مريم سيف وزوجها محمد شرف، حيث كانوا يعتقدون بأنهم يعيشون أفضل حياة على الإطلاق مما أصابهم بصدمة كبيرة عند خروج مثل هذه المشاكل للعلن والتي تصل إلى حد الرغبة في طلاق بائن ونهائي.

نهال تعلق: هحكيلكم قصة حقيقية للعبرة

وكانت من أبرز التعليقات رواية نهال محسن، كاتبة لقصة حدثت معها عن الحسد والسحر، معلقةً: «أنا الحقيقة مش عارفة مين دول بس بيقولوا إنهم بلوجر مشاهير على السوشيال ميديا وكانوا اقوي قصة حب وحوارات كدة وهوب فتحوا النار ع بعض وأطلقوا، الله يسهل لهم حالهم بس فعلاً التعليق أستوقفني ، أستوقفني أوي ورجعني لذكري كنت بحاول أنساها لكنها حصلت معايا بالفعل ..بنت زميلة ليا في الشغل كانت من محافظة ثانية غير محافظة القاهرة وكانت علطول لما تنزل القاهرة كانت تقولي أجي أبات عندك بدل ما أقعد لوحدى في أوتيل ، وكنت برحب بيها جداً خاصة إن بابا كان الله يرحمه توفي وأخواتي في بيوتهم وأنا وماما لوحدنا فا مافيش مشكلة أهلا وسهلاً ..».

وتابعت الكاتبة الشهير عبر منصات التواصل: «الصراحة هي كانت لطيفة لطف مبالغ فيه وأي حد يشوفها يحبها من ملائكيتها الشديدة لحد ما أقرب صديقة ليها في الشغل بعدت عنها فجأة ولما سألتها ليه يابنتي عملتلك إيه قالتلي جملة واحدة :( بتكره الخير لغيرها يانهال ومؤذية أوي )مكنتش مستوعبة فكرة إن حد ممكن يكره الخير لغيره من الباب للطاق كدة ، طب ليه ؟! ياعني لا تعرفني ولا أعرفك ولا أذيتك في يوم تكرهني وتكره الخير ليا ليه ؟! كنت لسه ب سذاجة الطفولة وفاكرة إن الي يكرهك ده لازم تكون أذيته في حاجة مكنتش أعرف إن فيه ناس بتضحك في وشك وهم ألد الأعداء بجد ..».

وواصلت : «المهم في يوم كعادتها جت القاهرة وطلبت تيجي تبات عندي وبالفعل وافقت وعادي دخلنا نمنا وفي نص الليل حسيت إن فيه نور في الأوضة بفتح عيني لقيتها فاتحة الدولاب وعمالة تقلب فيه فتحت نور الأباچورة الي جنبي وبسألها في حاجة لقيتها بصتلي بنظرة عمري ما نسيتها ولا هانساها نظرة كلها غضب وكره مع إنها كانت بتبتسم إبتسامتها الناعمة الدائمة وردت بكل هدوء : لا أبداً حسيت إني بردانة وقلت أشوف بادى عندك البسه يدفيني).

وأكملت: «بعد ما مشيت الصبح قلقت بصراحة وقلبت أنا وماما الدولاب حته حته لحد ما لقيت حاجة مطبقة ومحطوطة في جيب بنطلون بيجامة ، بفتحه لقيت صورتي وعليها كلام بالفقر والمرض ،عمل من الأخر طبعاً ماما لما شافته قالتلي هاتيلي مياه بملح بسرعة وقعدت تقوم بطقوس خاصة كدة ليها وتقرأ قرأن وترش في البيت كله مياه مقروء عليها قرأن وانا مابقتش مصدقة نفسي هل ممكن يوصل الأذي لكدة ؟!، ولما كلمت البنت وسألتها أنتي الي حطتيلي العمل ده طبعاً أنكرت في الأول لكن لما أتغيرت معاها لقيتها بعتالي رسالة بتقولي : (أنا بكرهك وبكره أبوكي الي كان بيحبك ده إشمعني أنتي يبقي ليكي أب بيحبك كدة وأنا أبويا عمره ما حبني).

وأردفت: «تخيلوا..مجرد إني كنت بحكي عن بابا الله يرحمه والي عمله معايا وحبه ليا وحبي ليه عمل إيه في قلب إنسانة ؟! فيه ناس فعلاً مؤذية لدرجة لا يمكن نتصورها ومش لازم نكون أذيناهم في حاجة ولا عملنا فيهم حاجة علشان يكرهونا ، النفوس المريضة كتير والنفوس الي كارهه حياتها أكتر ، ماتبعدوش عن الناس ولا تقولوا الإعتزال راحة لأ ده تفكير خاطئ برضه ، الصح إنكم تتعاملوا بحرص وحذر وتختبروا الناس حواليكم ومش أي حد يدخل بيتكم ولا يعرف حياتكم ،وبرضه مش أي حد يشوف النعم الي عندكم لأن كل ذي نعمة محسود مهما كانت في عينك بسيطة ...».

واستطردت: «احمدوا ربنا علي النعم وحافظوا عليها واتحصنوا بحصن الله عز وجل واحموا بيوتكم ونفوسكم اولادكم وأموالكم وأعمالكم بذكر الله واعرفوا إن الناس أنواع مش علشان نوع شرير موجود يبقي نحرم قلوبنا من النفوس الصافية ..تخيروا الأخيار وأستعيذوا بالله من شر النفوس ..نهاركم ستر وجمعة مباركة 🥰#نهال_محسن».

داليا تضيف: فيه كواليس في حياة المشاهير احنا مبنشوفهاش

وفي ذات السياق، أضافت فتاة تدعي داليا سمير: «بصوا يا جماعه الحوار حقيقي مرعب مريم سيف البلوجر اللي اتشهرت بالخاتم السوليتير اللي عريسها هداها بيه ف فرحهم وكان بيشيلها دايما ف اي مناسبه مريم اتكلمت امبارح ورافعه قضيه طلاق للضرر مريم طلعت هي اللي فرشه بيتهم كله وهي اللي شايله الليله كلها والباشا بس بيتصور وبيطلع معاها منظر بنات كتير كانت بتتمني تتحب زي مريم ويجيلها هدايا حلوه ومفاجأت زي مريم وقبل مريم كان امال ابو المجد اللي برضو جوزها متكلفش ف جوازتهم جنيه وضربها علشان بطلت تصرف وتعبت وعايزاه يشيل معاها ده يعلمنا ان مش كل اللي بنشوفه حقيقه ف جزء ف الصوره دايمآ ناقص ف ضحكه مزيفه ف حلقه مفقوده دي ف الكواليس احنا مبنشوفهاش بنات كتير انا اعرفهم نفسهم يبقوا بلوجر ونفسهم حياتهم تبقي زي المشاهير ويتجوزوا الناس الحلوه دي اللي كل حياتهم ورد وخروجات 90 ف الميه من الناس إن مكانش كلهم إلا من رحم ربي حياتهم فيك علشان الريتش ميوقعش والتريند وحقيقي البيوت قافله ع حاجات كتير احنا منعرفهاش ربنا يعين كل واحد ع حاله امال ابو المجد طول الوقت كانت بتتكلم عنه وعن قد ايه هو حاجه عظيمه وهي فازت بيها متصدقوش ياجماعه حتي الاعلانات بتاعتهم بتكون فيك ولو حد فيكم جرب منتج او براند هما عملولوا دعايا هيتاكد بنفسه لان مش بيكون زي ماهما اتكلموا عنه بيبقي فستك علي رأي الفنانه روبي 😂😂 كلها دعايا وبزنس وحقيقي بزعل ع الاطفال هي اللي بتدفع تمن اختيارك لحد غير مؤهل انه يكون اب وزي مابيقولوا بيخلف ويرمي امال ابو المجد حامل ف بيبي و مريم معاها بنوته وابوها مبيسألش عليها وف فويس بيقولها محتاجين مصروف شهري فاكر ان الكام ملطوش اللي هيبعتهم ده لو بعتهم اصلا هما اللي هيربوا اختاري صح من الاول راجل ابن حلال يتقي ربنا فيكي وميظلمش ولادك بعد كده لاﻧك بتفضلي تدفعي التمن العمر كله حتي لو فات سنين بتفضلي شايله شيلتك لوحدك متتخدعوش بالمظاهر ولا بالشو ولا بالتريند ولا بالكام كلمه الحلوين اللي بيتقالوا ف الاول لأنك بتاخدي ع عينك لوحدك وربنا يعينهم ويعين كل واحده علي شيلتها».

نورهان تنبه: كنت بتمني حياتهم لكن بقا حلمي أعيش حياة هادئة

وفي نفس السياق، لفتت فتاة تدعي نورهان ماهر، في تعليقها على أزمة مريم سيف وزوجها محمد شرف: «كونت بقول ساعه حوار امال ابو المجد ، لي مش كل البلوجر زي مريم سيف وجوزها 😅.. طلعت انيل منها الراجل الي يسمح انو يحضر فرحو بفلوس مرتو يبق مش راجل //الراجل الي ياكل ف بيتو من فلوس من مرتو يبق مش راجل // الراجل الي يستخسر ف اهل بيتو ويدي الغريب مش راجل…..لكن الست لزم تقف جنب جوزها وتسعدو، بس معنوي اكتر من مادي ليه الحال وصل لكده ، قله دين وقله عقل ولا غصب علينا من ربنا ، الدنيا مبقاش فيها امان// اتمني اما اتجوز اعيش حياه هاديه زي م شوفتها مع بابا وماما واتمني جوزي ميحذلنيش اتمني يكون غيور علي اهل بيتو ويكون ونعمه الاب والزوج والصديق والحبيب واتمني مكنش زي كل العلاقات بتعت دلرقتي اهم حاجه عندهم الناس وهما حياتهم بايظه واتمني اكمل ف علاقتي معها طول العمر واتمني يكون ابن اصول وعشان ف زمنا ده مبقاش فيه ااصول اساسا .. الراجل الي بيتاجر بمرتو او خطبتو مش راجل والراجل الي يخلو مرتو تصرف عليه مش راجل والراجل الي بيكسب من ورا صور مرتو وبيتشهر بيها مش راجل والراجل الي بيدو يشتغل وبياخد فلوس من مرتو وقاعد ف البيت مش راجل 👏🏻حسيبي الله ونعمه الوكيل ف كل راجل ضحك ع بنت وحسيبي الله ونعمه الوكيل ف راجل بيهدم بيته عشان مش راجل».

سعد: مريم سيف على خطأ وأشجعها على الطلاق

وعلى جانب آخر، يشير البلوجر سعد كوستا: «ولسه في ناس بتهاجمني ان الست هي سبب خراب العلاقه❤️‍🔥 طبعا كلنا شايفين مشكله البلوجر مريم سيف مع زوجها وان خلاص قررت تنفصل وعندهم بنوته مكملتش سنه، وهو متبت مش عايز يطلق بحجه الحب وهي قررت ترفع قضيه طلاق للضرر وانا بصراحه انا بشجعها جدااا وهشجع اي ست مش مبسوطه مع جوزها ولا ان جوزها رجل غير مسؤل ومش عارف يكون رجل لها وعارف بس انه يكون رجل عليها وانه يغلط فيها ويساعد اي حد انه يغلط في حق الست للي معاه هشجعها انه تبعد طالما مش مبسوطه وعايشه مع شبه رجل ….بس مش هشجع مريم ولا هشجع اي ست ولا رجل انهم يطلعوا يردحوا لبعض ع سوشيال ميديا ويطلعوا اسرارهم بره بيتهم وعيلتهم لان دي اسرار زيها زي اسرار القبر بظبط انا اتربيت علي كده اي انفصال يحصل في هدوء واي مشاكل تتحل بين الطرفين مع الاهل وبس لكن الفضايح واستغلال سوشيال ميديا الامور زي دي لا ولا هحب موضوع يبقي فيه مؤيدين ومعارضين……

وكلمتين لاي رجل: عزيزي الرجل لو مش هتبقي رجل خارج من بيت محترم هتحافظ علي الست للي اخذتها من بيت باباها وهي كانت عايشه معززه مكرمه وتديها حقوقها كامله متكامله وتعرف تخليها مبسوطه متتجوزش يا بابا اهلك اولي بيك لكن متروحش تاخد واحده وتمرمطها معاك وتنتهي بالطلاق وفضايح انا بشوف عجايب ولله ولو مش هتعرف تكون اب ولا هتعرف تراعي ربنا في نعمه ربنا يبقي برضو متتجوزش اهلك وست الحجه اولي بيك انتم مجتوش الدنيا عشان تقرفوهم معاكم وتطلعوا لينا جيل معقد بسبب القرف بيحصل ف العلاقه بسببكم .. وكلمتين لأي بنت: "يا عزيزتي لو شكيتي او حسيتي في فتره التعارف ان الرجل للي معاكي ده مش تمام ابعدي وهيجيلك نصيب أحسن بمراحل ولاه ما جاش بلاش من الارتباط وظلم أطفال خالص».