تحدثت بسملة العطار أول مدربة كاراتيه من قصار القامة عن تعرضها للتنمر الشديد، قائلة:"لما كنت بنزل من البيت عشان أروح مدرستي، كان المدرس بيقولي اطلعي اكتبي على الصبورة، كنت بقولة مش طايلة، فكان يقولي أطلعي أكتبي على الصبورة بدل ما أحطك ميدالية في جيبي، و لما قالي الكلمة دي كل الفصل ضحك عليا".

وأضافت بسملة العطار خلال مداخلة هاتفية مع برنامج "8الصبح" المذاع على فضائية "dmc"، قائلة:" كنت بقول لمامتي أنتي ليه جبتيني، ياريتك ما كنتي جبتيني، وكنت لسه صغيرة، في أولى أبتدائي"

وتابعت:"المفروض المدرس بيكون زي الأب و الأم، و المفروض يبقى مربي بالنسبة للطفلة، المفروض بدل ما يقولي الكلمة دي، يقول لزمايلي لا متتنمروش عليها، المدرس هو الي كان بيتنمر عليا".

وأوضحت أول مدربة كاراتية من قصار القامة، أن والدها رفض أن تختبئ في المنزل لتتجنب تنمر المجتمع عليها ، بل شجعها على مواجهه المجتمع، مؤكدة أن والدها ووالدتها شجعاها على ممارسة الكاراتية.

وأكملت:"أنا كنت بلعب مع طوال، كلهم طوال مفيش حد زي، فلما روحت ألعب معاهم، رجعت قولت لبابا لا أنا مش هلعب، بس لما الكابتن سمع كلامي ده، قالي لا هتلعبي غصب عنك، وده الي خلاني لعبت".